Ж.Золжаргал

УИХ-ын гишүүн

-Монгол Улс хамтарсан засгийг байгуулахдаа олуулаа нийлж байгаад түүхий эдээ зараад нэлээд мөнгө олно, хилээ холбоно, олон мега төслүүдээ их хүчээр зэрэг хэрэгжүүлнэ гэсэн. Гэтэл дэлхийд түүхий эдийн үнэ, орчин өөр болчихлоо. Ингээд мөнгө нь байхгүй болсон учраас цомхон төсвөөр илүү цэгцтэйгээр, хэдэн гол төсөл дээрээ фокуслаад ажиллах байтал бүх төслүүдээ заавал хэрэгжүүлнэ гээд байгаа. Иймд эдийн засгаа сэргээх, бартераар валютаа авч явах зүйл ярьж байгаа. Тэр дотроо түүхий эдээ хямд үнээр, бартераар өгөх зүйлс бий. Энэ бол Монголын эрх ашигт нийцэхгүй зүйл. Үүнийг хэд хэдэн хувилбараар түлхээд байгаа. Хэрэв ингэх дээрээ тулсан бол татсан нь дээр. Би энэ үзэл санаагаар гарын үсэг зурж, үзэл бодлоо илэрхийлсэн. 

Таамаг зөрвөл томъёогоо өөрчлөөд л явна.

Бүгдээрээ хамтарч том төслүүд хийе гэтэл орчин нөхцөл өөрчлөгдөж, мөнгө ховордоход цөөн төслөө барьж аваад явахын оронд заавал бүгдийг хийнэ гэж нутаг усаа бартердах санааг ил, далд шахах нь аюултай болсон тул энэ засаг одоо больсон нь дээр.

Т.Доржханд

Гадаад худалдаа, хөрөнгө оруулалтын асуудал хариуцсан Шадар сайд, УИХ-ын гишүүн

-Үндэслэлгүйгээр хөрөнгөжиж, тэр хөрөнгөөрөө тансаглан гадаадад байшин авч, оффшор дансанд мөнгөө байршуулсан эрх мэдэлтэй хүмүүс хариуцлагаа хүлээ, энэ мөнгөө төлөөд эрх чөлөөтэй яв гэдэг хоёр сонголтыг өгөх гээд ярьж байна. Ямар нэгэн байдлаар хүмүүсийн орлогыг үндэслэлгүйгээр хурааж, улстөржүүлж, өрсөлдөгчөө намнах гэж байгаа зүйл огт биш. Бид хуулийн эрх зүйн орчныг нь Засгийн газар дээр ярьж байгаад нээнэ.

Эрх мэдэлтэй хүмүүс нь бүгдээрээ орлогоо нотлоё. Нотолж чадахгүй бол улс төрийн хариуцлага хүлээж, үүрд явна. Энэ ажлыг Ерөнхий сайд өөр манлайлан хийж байна. Өөрөө орлогоо нотолно. Хэрвээ нотолж чадахгүй бол ажлаа өгнө.

Мөн бидний хувьд ийм асуудал гарвал орлогоо нотолно, чадахгүй бол ажлаа өгнө. Ямар ч асуудал байхгүй. Энэ зарчим бол зөв.

Залуусын жагсаал цуглаан хийж байгаа нь зөв. Ардчилсан нийгэмд үгээ хэлж, үзэл бодлоо илэрхийлэх ёстой. Харин нөгөө талдаа энийг ашиглаж, улс төрд тогтворгүй байдал үүсгэх, хил холболтын бүтээн байгуулалтыг гацаах, Монгол Улсын Засгийн газар сул, тогтворгүй, урт хугацаанд хамтарч ажиллаж чадахгүй юм байна гэж хөрөнгө оруулагчдыг үргээх эрсдэлтэй. Цаашлаад Засгийн газар хоорондын үргэлжилж байгаа тогтолцоог зогсоохыг хэрхэвч хүлээн зөвшөөрөхгүй.

Монголд хөрөнгө оруулалт хэрэгтэй байна. Монгол Улс  хаалттай, ядуу байна.

Дэлхий даяараа хөрөнгө оруулалтын орчин маш тааруу байна. Тарифын бодлогоос болж хөрөнгө оруулалт алга байна. Монгол битгий хэл Хятад, Орос улсад хөрөнгө оруулалт хийхгүй байна. Энэ үед гадаад экспортоо сайн хийж, ажлын байр бий болгож, эдийн засгаа тэлэх боломжгүй. Тиймээс тогтвортой Засгийн газар, бодлогыг хүсч байна. Тийм болохоор ХҮН нам, АН хамтарсан Засгийн газарт орсон. Тэрнээс биш зөөлөн суудал хүсч, халуун хөнжилд ороогүй ээ. Худлаа ярьж, хулгай хийх өчүүхэн ч эрх ашиг байхгүй.