Засгийн газрыг тойрсон асуудлаар УИХ-ын гишүүн, АН-ын бүлгийн дарга О.Цогтгэрэл өнөөдөр /2025.05.20/ мэдээлэл өглөө.

Тэрбээр "Ардчилсан нам Хамтарсан Засгийн газраас гарах тухай биш анхнаасаа Хамтарсан Засгийн газар байгуулагдах үйл явцыг миний бие хууль бус гэж үздэг. Үндсэн хуульд зааснаар аль нэг нам олонх болсон бол Ерөнхий сайдаа томилж, Засгийн газраа байгуулдаг. Тэгэхээр одоо яригдаж байгаа шаардлагууд зүй ёсных байх аа гэж бодож байна. Бүлгийн гишүүдээс ирсэн шаардлагатай танилцсан. Шаардлагатай бол бүлгийн хурал хийж, бүлэг дээр л асуудлыг ярина. Би бүлгийн өмнөөс шийдвэр гаргах боломжгүй.

Хэрэв Ардчилсан нам Хамтарсан Засгийн газраас гарвал намын даргад хариуцлага тооцох асуудлыг Ардчилсан намын Үндэсний бодлогын хороогоор шийдвэрлэнэ. Одоогийн байдлаар тус хороо хуралдах ямар нэгэн тов гараагүй байна. Бид намын удирдлага бусад гишүүдтэй холбогдож мэдээлэл солилцож ажиллана. Улс төрийн намын тухай хуулиар намууд эхэлж хуралдаад дүрмээ өөрчлөх ёстой. Үүний дараа зохион байгуулалтын асуудал яригдах болов уу гэсэн хүлээлт байна. 2024 оны сонгуулиар манай нам илүү их амжилт гаргах боломжтой байсан гэж би боддог. Иргэд Ерөнхий сайдыг орлогоо нотлохыг шаардаж байгаа. Энэ маш энгийн асуудал. Ийм асуудлаар нийгмийг талцуулж, улс төрийн асуудал болгож байхын оронд орлогоо нотлох хэрэгтэй.

Мөнгө мөртэй гэдэг биз дээ. Мөрөө тайлбарлаж чадахгүй бол хариуцлагаа хүлээгээд явах ёстой.

Ардчилсан намын дарга "Жагсаж буй залуусын ард захиалагч байгаа" гэж хэлэхэд нь би эмзэглэсэн. Энгийнээр орлогоо нотлохыг шаардаж буй залуусыг үгүйсгэж буй нь зарчимгүй явдал. Тэр дундаа Ардчилсан намын даргын хувьд байж болшгүй асуудал" гэв.