Ерөнхий сайд Л.Оюун-Эрдэнийн хүү О.Тэмүүлэнгийн тансаг хэрэглээ болон ард иргэдээ ялаа гэж дуудсан түүний үг нийгмийн бухимдлыг төрүүлж, түүнийг огцрохыг шаардсан жагсаал Төрийн ордны гадна болж байна. Харин Төрийн ордон дотор улс төрийн нөхцөл байдал хурцадмал, Засгийн газарт хамтарсан намын сайдууд Ерөнхий сайдын үг-үйдлийг хамгаалсан байр суурийг илэрхийлэх болсон. ХҮН намын дарга Т.Доржханд бүр төрийн өндөр албан тушаалтнууд хамтдаа шалгуулъя гэх байр суурийг гаргасан. Тэгвэл МАН-ыгн бүлгийн нэр бүхий гишүүд Ерөнхий сайдын хувь хүний асуудлыг намын асуудал болгож, Бага хурлаар хэлэлцэх боломжгүй гэх байр суурийг илэрхийлсэн байна.

МАН-ын бүлгийн хуралдаан нэлээд халуун уур амьсгал дунд болж, Ерөнхий сайдыг намын бүлгийнхэн нь огцрох саналаа өгөхийг шаардсан бололтой. Мөн МАН-ын бүлгийн гишүүд дараагийн Засгийн газраа ялсан нам нь байгуулаад, сөрөг хүчнүүд нь сөрөг хүчнийхээ ажлыг хийгээд явах ёстой гэсэн зарчмын байр суурийг тавьсан бололтой.

Өөрөөр хэлбэл, МАН эрх барьж буйн хувьд ял ямбаа эдлээд явах ёстой гэсэн шахалтыг  бүлгийн гишүүд нь түүнд тулгажээ.

Намын бүлгийн шахалтад орсон Ерөнхий сайд өөрөө огцрох өргөдлөө өгөхгүй гэсэн албан бус мэдээлэл байна.  Харин албан тушаал дээрээ үлдээд АН болон ХҮН намыг засгаас явуулъя гэсэн санал гаргасан байна. Тэрбээр өөрийн хүсэлтээр огцрохгүй бол танхимын сайд нарын 50 хувь нь огцрох өргөдлөө өгвөл Хамтарсан Засгийн газар бүрэн бүрэлдэхүүнээрээ огцроход хүрэх аж.

Мөн парламентын гишүүдийн 64 буюу ердийн олонх дэмжвэл Л.Оюун-Эрдэнэ гүйцэтгэх засаглалын тэргүүнээс бууна. Өнгөрсөн дөрвөн жилийн Ерөнхий сайд хийхдээ нам дахь өрсөлдөгч нараа авлига, албан тушаалын хэрэгт холбон замаасаа зайлуулсан тэрбээр өнөөдөр  өөрөө авлигын асуудалд нэр холбогдон албан тушаалаасаа буух дээрээ тулсан.

Түүний хувь эзэмшдэг гэж өөрийн амаараа зарласан "Херо энтертаймент" нь өнгөрсөн сонгуулиар МАН-ын болон Засгийн газрын бүх  пиар дээр ажилласан. Төсвийн мөнгөөр өөрийн хамаарал бүхий компаниар ажил хийлгэсэн нь ашиг сонирхлын асуудлыг нь түүнээс нэхэхэд хүрч байна. Мөн Эдийн засгийн чуулга уулзалтыг зохион байгуулсан компанийн бүртгэл дээр Л.Оюун-Эрдэнийн нэр байсан гэх олон асуудал авлигын шинжтэй байгааг ч намын гишүүд нь буруутгаж байгаа гэнэ.

Ерөнхий сайдын гол найдлага нь Л.Гантөмөр, Т.Доржханд, Х.Баттулга нар болж байгаа бололтой. Ямар ч байсан Засгийн газрын эмэгтэй сайд нар нь Засгийн газрын гишүүний хувиар ямар нэгэн байр суурийг илэрхийлэхгүй гэж. Харин АН-аас Х.Тэмүүжин Ерөнхий сайдын галзуу тансаглалыг шүүмжилсэн. Л.Оюун-Эрдэнийг ногоон гэрлээр Ерөнхий сайд болгосон хуурай ах Ерөнхийлөгч  У.Хүрэлсүх хэлсэн үг-үйлдэлдээ хариуцлага хүлээж ажлаа өгөхийг шаардсан гэх мэдээлэл байна.

Г.ШАРХҮҮ