Засгийн газрын хэрэг эрхлэх газрын /ЗГХЭГ/ дарга Н.Учрал "Ерөнхийлөгч асан Х.Баттулга стратегийн ордод хамаарах Төгрөг нуурын ордыг үндэстэн дамнуулан 250 сая ам.доллараар зарсан" гэж мэдэгдэл хийсэн. Улмаар Улсын Ерөнхий прокурорын шийдвэрээр АТГ, ЦЕГ, прокурорын хамтарсан өргөн бүрэлдэхүүнтэй ажлын хэсэг байгуулагдан тус хэрэг дээр ажиллаж эхэлсэн билээ. Тус ажлын хэсэгт дээрх хэргийг мөрдөн шалгах тодорхой хуулийн хугацаа байхгүй бөгөөд одоогоор хэргийг үргэлжлүүлэн шалгаж байгаа гэсэн мэдээлэл өглөө.

Ерөнхийлөгч асан Х.Баттулга Төгрөг нуурын ордтой холбоотой асуудлаар "Намайг авсан гэдгийг нотолчихвол би 100 хувь өгнө" гэж мэдэгдсэн байдаг. Тэгвэл хамгийн сүүлд “Монгол ялна” хөдөлгөөнөөс Ерөнхийлөгч асан Х.Баттулгад “Төгрөг нуурын орд газраа ард түмэнд буцааж авах шаардлага”-ыг бичгээр хүргүүлжээ.

Үүний хариуд тэрбээр, "Монгол Улсын Үндсэн хуулийн 6.1-д “ Монгол Улсад газар, түүний хэвлий, ой, ус, амьтан, ургамал болон байгалийн баялаг гагцхүү ард түмний мэдэл, төрийн хамгаалалтад байна” гэж заасан. Миний бие улс төрийн замналаа Үндсэн хуулийн энэ л заалтыг хэрэгжүүлэхэд бүхэлд нь зориулж явна. Та бүхний шаардлагад буй Төгрөг нуурын ордын лиценз миний болон миний хамаарал бүхий хэн нэг хүний мэдэлд байхгүй. Улсын бүртгэл, уул уурхай, ашигт малтмалын асуудал хариуцсан төрийн байгууллагаас лавлагаа авах зэргээр миний хариултыг олон арга замаар нягтлах боломжтой. Төгрөг нуурын орд миний мэдэлд байгаа эсэхийг тогтоож, олон нийтэд мэдээлэхийг хүсэж, цагдаагийн байгууллагад хандсан гэдгээ хэлье" гэжээ.