Японы Кагошима мужийн Сакуражима галт уул тавдугаар сарын 15-аас 16-ны өдрийг хүртэл хэд хэдэн удаа дэлбэрч, үнс нь 3 мянган метр дээш өндөрт цацагджээ. Улмаар Кагошимагийн нисэх онгоцны буудлын 30 гаруй нислэг тухайн өдрүүдэд цуцлагдахаас өөр аргагүйд хүрсэн байна.

Орон нутгийн хэвлэл мэдээллийн хэрэгсэлд мэдээлснээр, Сакуражима галт уулын Минамидаке оргил дахь тогоо орон нутгийн цагаар 15-ны өдрийн 10:45 цагийн орчимд дэлбэрч эхэлсэн.

Энэ нь 17 цаг үргэлжилж, 16-ны өглөөний 04:00 цагт унтарсан байна. Дараа нь өглөөний 08:00 цагаас хойш үе үе дэлбэрч эхэлсэн аж. Үүнээс өмнө тавдугаар сарын 12-нд Сакуражимад магмын хөдөлгөөнийг илтгэх уулын тэлэлт, царцдасны хөдөлгөөн ажиглагдсан боловч нөхцөл байдал хэрхэн эргэх нь бүрэн тодорхойгүй байжээ. Хэрэв цаашид дахин дэлбэрвэл Кагошима хот, Айра хот зэрэг хойд хэсэгт үнс нурах төлөвтэй байна.

Сакуражима галт уулын дэлбэрэлтийн улмаас Кагошимагийн нисэх онгоцны буудалд 15-ны өдөр 25 нислэг, 16-нд "Japan Airlines", "Skymark Airlines" зэрэг долоогоос доошгүй нислэг цуцлагджээ. Мөн Ханеда, Итами, Амами хүрэх байсан нислэгүүд цуцлагдсан байна. Үүний улмаас олон бизнес аялагчид гацаж, нислэгийн тасалбараа буцаах, чиглэлээ өөрчилж эхэлснээр Кагошимагийн нисэх онгоц гэнэтийн хөл хөдөлгөөн ихтэй болсон байна.