Өмнөд Солонгосын ерөнхийлөгч асан Юн Сук Ёл Ардын хүч намаас гарч буйгаа өнөөдөр мэдэгдлээ. Мөн тус намаас ерөнхийлөгчийн сонгуульд нэр дэвшиж буй Ким Мүн Сүг дэмжихийг ард иргэдэд уриалав.

Тэрбээр фэйсбүүктээ "Би өнөөдөр Ардын хүч намаас гарч байна. Хэдий намаасаа гарсан ч гэлээ би эрх чөлөө, үндэсний тусгаар тогтнолын төлөө цаашид ч тэргүүн эгнээнд зогсоно. Та бүхэн Ардын хүч намын Ким Мүн Сүг дэмжээрэй. Саналаа өгөөрэй. Санал нэг бүр энэ улсын эрх чөлөө, тусгаар тогтнол, хөгжил цэцэглэлтийн замыг засна" гэжээ.

Юн Сук Ёл өнгөрсөн оны арванхоёрдугаар сард богино хугацаатай цэргийн онц байдал зарласнаасаа болоод импичменттэй тулгарсан. Улмаар өнгөрсөн дөрөвдүгээр сард албан ёсоор огцорсон билээ.

Түүнийг намаас гарах хэрэгтэй гэсэн уриалга дотроосоо гарсан аж. Учир нь огцорсон ерөнхийлөгч намаас гарчихвал Ким Мүн Сүгийн сонгуулийн дүнд сайнаар нөлөөлнө гэж үзжээ. Харин нэр дэвшигч Ким Мүн Сү энэ тал дээр төвийг сахьсан байр суурь баримталжээ.

Өрсөлдөгч талууд Юн Сук Ёлын мэдэгдлийг хэт өөрийгөө дөвийлгөсөн, төөрөгдсөн байсан гэж шүүмжилжээ. Түүнийг цэргийн онц байдал зарлаж ард түмнийг сандаргасандаа уучлал гуйгаагүй, ямар ч харамссан шинжгүй байсан гэж шүүмжилж байна. Шинэ реформ намаас нэр дэвшиж буй Ли Жүн Сок "Эмх замбараагүй байдал үүсгэсэн хүн эрх чөлөө, хууль дээдлэх ёс, бүрэн эрхт байдал, аз жаргал, аюулгүй байдлын тухай ярьж байгаа нь жигшмээр юм" гэжээ.