Холбооны мөрдөх товчооны дарга асан Жеймс Коми АНУ-ын ерөнхийлөгч Дональд Трампийн эсрэг үзлийг өөгшүүлсэн гэх үндэслэлээр нууц албаныханд байцаалт өгчээ. Тэрбээр Дотоодын аюулгүй байдлын албаны Вашингтон дахь төв байранд сайн дураараа нэг цаг орчим байцаалт өгсөн бөгөөд цагдан хоригдоогүй.

Коми далайн хясаагаар "8647" гэсэн тоог бүтээсэн зургийг инстаграмд хуудсандаа нийтэлсэн байна. Үүнийг Бүгд найрамдах намынхан Трампийн эсрэг үзэл гэж үзжээ.

Учир нь 86 нь татгалзах, салах гэсэн утгыг илэрхийлдэг хэллэг аж. Сүүлийн үед алах гэсэн утгаар ч 86-г хэрэглэх болжээ. Харин 47 нь АНУ-ын 47 дахь ерөнхийлөгч буюу Трампийг илэрхийлнэ гэж үзэв.

Трамп "Fox News"-т ярилцлага өгөхдөө "Холбооны мөрдөх товчооны захирлын албан тушаалаас 2017 онд буусан Коми намайг алахыг уриалж байна. Энэ ямар утгатайг тэр сайн мэдэж байгаа. Тэр хүүхэд мэдэлгүй яахав. Хэрвээ та Холбооны мөрдөх товчооны захирал мөртлөө энэ тооны утгыг мэддэггүй бол энэ чинь аллага гэсэн үг шүү. Маш ойлгомжтой, тодоор хэлж байгаа хэлбэр" гэжээ.

Комид ял тулгах эсэх шийдвэрийг Ерөнхий прокурор Пам Бонди гаргана.

Коми өөрөө "8647" зургийн талаар тайлбар хэлэхдээ "Би үүнийг улс төрийн мессеж гэж бодсон. Зарим хүн үүнийг хүчирхийлэлтэй холбож байгааг ойлгоогүй. Миний санаанд тийм зүйл орж байгаагүй. Би аливаа хүчирхийллийг эсэргүүцдэг тул энэ зургаа устгасан" гэжээ.