Гурван жил үргэлжилсэн дайныг зогсоох хүчин чармайлтад үл ялиг ч болов ахиц дэвшил гарсан нь Баасан гаригт болсон хэлэлцээ байлаа. Орос, Украины талууд 2022 оны гуравдугаар сараас хойш анх удаа нүүр тулан уулзсан энэхүү яриа хэлэлцээний дүнд хоригдол солилцооны тохиролцоонд хүрчээ. Энэ хүрээнд талууд 1000 хоригдол солилцоно.

Хэлэлцээ Истанбул хотын Босфорын эрэгт байрлах Оттоманы эзэнт гүрний үеийн ордонд болсон юм. Зуучлагчаар Турк, АНУ ажиллав. Танхимд Украин, Турк, Оросын далбаануудаас тус тус хоёрыг өлгөжээ.

Талууд гарин барин уулзсангүй. Мөн Украины төлөөлөгчдийн тал нь цэргийн хувцастай ирлээ. Энэ нь Украин халдлагад өртсөөр байгааг харуулсан үггүй илэрхийлэмж юм.

Туркийн Гадаад хэргийн сайд Хакан Фидан "Бидний урд хоёр зам байна. Нэг нь энх тайванд хөтөлнө, нөгөөх нь илүү их үхэл, сүйрэл рүү аваачна" гэжээ.

Яриа хэлэлцээ хоёр цаг орчим үргэлжилжээ. Украины албаныхны хэлснээр Кремлийн төлөөлөгчид цоо шинэ бөгөөд хүлээн зөвшөөрөх боломжгүй шаардлагуудыг хүргүүлсэн байна. Үүнд, Украины газар нутгийн томоохон хэсгээс Киевийн цэргүүд ухрах багтжээ. Таамаглаж байсанчлан эвлэрлийн асуудалд ахиц гараагүй ч гэлээ хоригдол солилцох тохиролцоонд хүрч чадсан байна.

Украины Гадаад хэргийн дэд сайд Серхий Кислиця "Маш хүнд өдрийн тун давгүй төгсгөл байлаа. 1000 гэр бүлийн хувьд сайн мэдээ байх нь дамжиггүй" гэжээ. Харин Украины хэлэлцээчдийн ахлагч бөгөөд Батлан хамгаалахын сайд Рустем Умеров "Солилцоог удахгүй зохион байгуулна. Огноогоо тохирсон ч гэлээ зарлах арай болоогүй байна. Дараагийн алхам бол Зеленский, Путин нарын уулзалт байх хэрэгтэй" гэв.

Доорх зурагт Орос, Украины талыг төлөөлж ирсэн хэлэлцээчдийг харуулав.