МУИС-ийн төв байртай залгаа гурван давхар байшинд МУИС-ийн Хууль зүйн сургууль, Хэрэглээний шинжлэх ухаан инженерчлэлийн сургууль байлаа. Гэвч 2023 оны есдүгээр сард хичээлийн байр ашиглалтын шаардлага хангахгүй болсон гэх дүгнэлтээр барилгыг нураасан байдаг. Тус сургуулийн 64 жилийн түүхтэй барилгыг нураагаад 2025 онд ашиглалтад оруулна гэж төсөвлөж байсан ч ашиглалтад ороогүй байгаа юм.

Энэ талаар өмнө нь Боловсролын сайд П.Наранбаяр байнгын хорооны хурлын үеэр ярихдаа "МУИС-ийн өргөтгөл буюу гуравдугаар байрны бүтээн байгуулалтын ажлыг дуусгах ёстой. Харамсалтай нь 2025 оны төсөвт энэ ажлын төсвийг тусгаж чадаагүй. Учир нь магадлан үнэлгээгээр орж, зардал нь нэлээд өссөн байдалтай байгаа. Өнгөрсөн жил барилгын ажил эхэлсэн ч зогссон байдалтай байна" гэдгийг хэлж байв.

МУИС-ийн Хууль зүйн сургуулийн шинэ барилгын шав тавих ёслол өнгөрсөн 2022 оны есдүгээр сард болж байв.

Гэвч хичээлийн байр ашиглалтын шаардлага хангахгүй болж, нураах асуудлыг олон жил ярьсан. Иймээс тус сургуулийн багш, ажилтны ажиллах орчныг сайжруулах, оюутан суралцагчдын боловсрох нөхцөлийг хангах зорилгоор орчин үеийн шийдэлд нийцсэн МУИС-ийн Хууль зүйн сургуулийн шинэ барилга барихаар төлөвлөсөн юм.

Хичээлийн шинэ өргөтгөл нийтдээ долоон давхар, хоёр блокоос бүрдсэн барилга баригдана.

Ингэхдээ, А блокын санхүүжилтийг 2023 оны улсын төсөвт суулгасан бол Б блокын санхүүжилт болох 12 тэрбум төгрөгийг тус сургууль гаргасан талаар албаныхан мэдээлж байв. Шинэ байрны нийт төсөвт өртөг нь 42,3 төгрөг болох аж. Хууль зүйн сургуулийн тухайд гэвэл Улаанбаатар сургууль руу бүхэлдээ нүүсэн байдаг.

БНМАУ-ын Сайд нарын Зөвлөлийн тогтоолоор 1957 онд Хууль зүйн их дээд сургууль байгуулах тогтоол гарч, 1960 оны есдүгээр сарын 1-ний өдөр Нийгмийн ухааны факультетын дэргэд анхныхаа хичээлийг орж байсан түүхтэй. Улмаар 1970-аад онд хуулийн салбар өргөжин тэлж, 1993 онд Хууль зүйн факультетыг байгуулж, түүнээс хойш МУИС-ийн Хууль зүйн сургуулийн байр нь МУИС-ийн гуравдугаар байр болсон түүхтэй.