ОХУ-ын сонгууль ажиглагч цор ганц бие даасан байгууллага "Голос хөдөлгөөн"-ий тэргүүн Григорий Мелконяанцыг "зохисгүй байгууллага"-тай хамтарч ажилласан гэх үндэслэлээр буруутгаж, 2023 оны наймдугаар сард баривчилсан. Тэгвэл Лхагва гаригт түүнд таван жилийн хорих ял оноожээ.

44 настай Григорий Мелконяанцыг буруутгасан нь дайн эхэлснээс хойш эрчимжээд буй иргэний нийгмийн эсрэг тэмцлийн нэг хэсэг гэж хүний эрхийн идэвхтнүүд үзэж байна.

Шүүх хурлын үеэр Мелконяанц танхимд хүрэлцэн ирсэн дэмжигчиддээ хандан шүүхийн шийдвэрээс болж сэтгэлээр унахгүй байхыг уриалжээ.

Дээр дурдсан "зохисгүй байгууллага" гэдэг нь Монтенегрод төвтэй Сонгуулийн хяналтын байгууллагуудын Европ дахь сүлжээг хэлж буй. Энэ нь Европ болон Төв Ази дахь хуучин коммунист орнуудын ажиглагчдыг хооронд нь холбодог байгууллага юм. ОХУ-ын эрх баригчид 2021 онд Сонгуулийн хяналтын байгууллагуудын Европ дахь сүлжээг "зохисгүй байгууллага" ангилалд оруулсан билээ. Тэр цагаас хойш Сонгуулийн хяналтын байгууллагуудын Европ дахь сүлжээтэй огт харилцаагүй гэдгээ "Голос хөдөлгөөн" мэдэгдсэн.

Аливаа байгууллагыг "зохисгүй" гэж шошголосноор ОХУ-ын нутаг дэвсгэрт үйл ажиллагаа явуулах эрхгүй болдог. Мөн ажилчид болон салбар байгууллагуудыг нь эрүүгийн хариуцлагад татдаг. ОХУ 2015 оноос хойш энэ хуулийг хэрэгжүүлж, хараат бус хэвлэл мэдээлэл, сөрөг хүчнийхэн болон гадаадын байгууллагуудыг "зохисгүй" гэж шошголох болсон.

Дашрамд дурдахад, голос гэдэг нь дуу хоолой болон санал өгөх гэсэн хоёр утгыг илэрхийлдэг үг. Тус байгууллага 2011 оны парламентын сонгуулиар сөрөг хүчнийхний эсэргүүцэлтэй тулгарч байв. Дараа нь 2012 оны ерөнхийлөгчийн сонгуульд луйвар орсон гэж мэдээлснээр эрх баригчдын дургүйцлийг төрүүлсэн. Өнгөрсөн оны ерөнхийлөгчийн сонгуулийг ч "Голос хөдөлгөөн" шүүмжилсэн бөгөөд Оросын түүхэнд байгаагүй авлигад идэгдсэн сонгууль гэж нэрлэжээ.