Орос, Украины талууд өнөөдөр /2025.05.15/ гал зогсоох асуудлаар Туркт уулзана. Энэ уулзалтад Зеленский өөрийн биеэр оролцоно гэдгээ мэдэгдсэн билээ. "Хэрвээ Оросын ерөнхийлөгч зөвшөөрвөл түүнтэй нүүр тулан ярилцахад бэлэн, энэ уулзалтыг баталгаажуулахын тулд юу ч байсан хийнэ" гэж тэр хэлж байв.  Кремлийн хувьд уулзалтад бэлэн гэдгээ мэдэгдсэн ч Путин оролцох эсэх нь тодорхойгүй байсан.

Тэгвэл Истанбулын хэлэлцээнд оролцох Кремлийн албан тушаалтнуудын жагсаалтад Путины нэр байхгүй байгааг "BBC" мэдээллээ. Оронд нь ерөнхийлөгчийн зөвлөх Владимир Мединский тэргүүтэй төлөөлөгчид Истанбулыг зорьж байна.

Персийн булангийн орнуудаар айлчилж буй Трамп Турк руу зам хазайж, тэдний уулзалтад нэгдэж магадгүй гэж байсан ч бас л үгүй бололтой. Гэхдээ түүний хувьд хэрвээ Путин ирвэл би очно гэсэн байр суурьтай байсан билээ.

Зеленский өнөөдөр Анкара хотноо Туркийн ерөнхийлөгч Режеп Тайип Эрдогантай уулзана.

Тэрбээр өчигдөр орой /2025.05.14/ ээлжит видео мэдэгдлээ хийхдээ "Оросоос хэн хэн ирэх нь үү харж байя. Түүнээс нь хамаарч Украин цаашид ямар арга хэмжээ авахаа шийднэ. Одоогоор хэвлэлээр явж буй зүйлс үнэмшилгүй байна" гэсэн юм.

Дашрамд дурдахад, Путин, Зеленский нар 2019 оны арванхоёрдугаар сараас хойш биечлэн уулзаагүй. Харин Орос, Украин улс хамгийн сүүлд 2022 оны гуравдугаар сард Истанбулд шууд яриа хэлэлцээ хийсэн билээ. Энэ удаагийн Турк дэх уулзалтыг Путин анхлан санаачилж, уриалсан боловч тэр өөрөө хүрэлцэн ирэхгүй бололтой.

Трамп Туркт ирэхгүй ч АНУ-ын топ дипломатч Марко Рубио өнөөдөр тус улсад айлчилж байна. Тэрбээр НАТО-ийн Гадаад хэргийн сайд нартай уулзах юм. Үүнийхээ дараа тэр Истанбулыг зорьж, Украины дайны асуудлаар Европын түншүүдтэйгээ уулзана.