Казахстан улсад үргэлжилж буй цахим спортын "CS2" төрлийн "PGL Astana 2025" тэмцээний плей-оффд өрсөлдөх багуудын нэрс бүрэн тодорлоо. 16 багтай эхэлсэн тэмцээний дараагийн шатанд найман баг шалгарсан бөгөөд "The MongolZ" баг тэдний нэг.

Плей-оффын шатанд тэдний өрсөлдөгч нь турк тамирчидтай Сербид төвтэй "Aurora" баг байх болно. Хуучин "Eternal Fire" багийн бүрэлдэхүүнд байсан тэд энэ жил бүрэн бүрэлдэхүүнээрээ Серби руу зарагдсан билээ. Турк фэнүүд нь ч нутгийнхаа бахархал болсон тамирчдыг өөр улсын, өөр баг руу явахад их л эмзэглэсэн, шүүмжилсэн. Энэ талаар Озгур Экер буюу "woxic" ярихдаа "Эхэндээ фэнүүдээ тайвшруулахад бага зэрэг хэцүү байсан. Өөрсдийнхөө талаар олон удаа тайлбарлах хэрэгтэй болсон. Учир нь манай фэнүүд их сэтгэл хөдлөлтэй. Хэцүү байсан. Гэхдээ бид ойлгуулж чадсан" гэжээ.

Хоёр багийн тоглолт маргааш/2025.04.16/ 13:00 цагаас эхэлнэ.

"The MongolZ" баг "Aurora"-ийн одоогийн бүрэлдэхүүний цөмтэй нийт зургаан удаа тогложээ. Үүнээс дөрөвт нь монгол баг хожсон үзүүлэлттэй байна. Сүүлд "IEM Katowice 2025" тэмцээний плей-оффд учраа таарахад "The MongolZ" баг 2-0 гэсэн харьцаатай хожсон аж.

Дээрх учраа "PGL Astana 2025" тэмцээний плей-оффын эхний шатны хамгийн сонирхолтой тоглолтоор нэрлэгдэж байна. "CS" сонирхогчид ч өөрсдийн таамгаа дэвшүүлжээ. Ерөнхийдөө "The MongolZ"-ийг ялна гэх олон хүн байна. Гэвч "The MongolZ"-ийг хэт өндрөөр үнэлэгдсэн, "Aurora"-г дутуу үнэлж болохгүй баг гэх мэт сэтгэгдэл олон байх аж. Сонирхолтой нь "The MongolZ"-ийг "Vitality"-ийг цомд хөтлөгч хөтөч нь гэжээ. Учир нь "The MongolZ" тэмцээн бүрийн хэсгийн шат, плей-оффоор томоохон багуудыг хожиж, хасч "Vitality"-ийн замыг засдаг боловч өөрсдөө хагас шигшээд тахим буулгадаг гэнэ.

Бусад оноолт

• Astralis – NAVI
• FURIA – MIBR
• NIP – Spirit