"Malaysia Airlines"-ын "MH17" нислэг 2014 оны долдугаар сард Амстердамаас Куала Лумпур чиглэлд нисч яваад Украины агаарын орон зайд осолдсон билээ. Ослын улмаас зорчигч, хөлгийн багийнхан нийлээд 298 хүн бүгд харамсалтайгаар амиа алдсан. Тэдний 196 нь голланд, 38 нь австрали хүмүүс байжээ.

Тиймээс Голланд, Австралийн засгийн газар 2022 онд ОХУ-ыг энэ осолд буруутгаж, хэрэг үүсгэсэн юм. ОХУ Олон улсын шүүхийн харьяаллыг хүлээн зөвшөөрдөггүй учир тэд Гаагт хандаж чадаагүй аж.

Тэгвэл НҮБ-ын нисэхийн агентлаг энэ хэрэгт ОХУ-ыг буруутай гэж үзэв. НҮБ-ын дэргэдэх Олон улсын иргэний нисэхийн байгууллагын зөвлөл Даваа гаригт "ОХУ нь олон улсын агаарын хуулийн дагуу хүлээсэн үүргээ биелүүлээгүй" талаар санал хураалт явуулжээ.

Онгоцыг ОХУ-аас гаралтай Бук пуужингийн системээр буудаж унагасан болохыг 2016 онд Голландад төвтэй олон улсын мөрдөн байцаалтын агентлаг тодруулжээ. Энэ нь иргэний агаарын хөлгийн эсрэг зэвсэг хэрэглэхгүй байхыг шаарддаг Чикагогийн конвенц буюу Олон улсын иргэний нисэхийн тухай конвенцийг зөрчсөн үйлдэл юм.

ОХУ энэ хэрэгт оролцоогүй гэдгээ удаа дараа баталсан боловч олон тооны нээлттэй эх сурвалж болон мөрдөн байцаалтуудад үндэслэн тухайн үеийн нарийн дүр зургийг цуглуулсан аж.