Тээврийн прокурорын газраас Эрүүгийн хуулийн 27.10 дугаар зүйлийн 5 дахь хэсэгт заасан тээврийн хэрэгсэл жолоодох эрхээ хасуулсан хүн согтуурсан, мансуурсан үедээ тээврийн хэрэгсэл жолоодсон гэмт хэргийн гаралт, шүүхээс оногдуулж буй  ял, шийтгэлийн байдлыг 2025 оны эхний дөрвөн сарын байдлаар судалсан байна. Тодруулбал, 2025 оны эхний дөрвөн сарын байдлаар 144 хүнд холбогдох хэргийг шүүхээр шийдвэрлүүлсэн нь өмнөх оны мөн үетэй харьцуулахад 2.5 дахин өсчээ.

Дээрх төрлийн гэмт хэрэг үйлдсэн нийт 144 хүнийг насны байдлаар нь авч үзвэл, 49.3 хувь нь 30-39 насныхан бөгөөд 97.3 хувь нь эрэгтэй байна. Судалгааны дүнгээс үзэхэд, тээврийн хэрэгсэл жолоодох эрхээ хасуулсан хүн согтуурсан, мансуурсан үедээ тээврийн хэрэгсэл жолоодсон хэрэгт дээд болон бүрэн дунд боловсролтой, хөдөлмөр эрхэлдэг хүмүүс зонхилон холбогджээ.

Үйлдэгдсэн нийт гэмт хэргийн 66.6 хувь нь өдрийн цагаар, 33.3 хувь нь шөнийн цагаар буюу 22.00-06.00 цагийн хооронд үйлдэгдсэн бөгөөд Сонгинохайрхан, Баянзүрх дүүрэгт хамгийн их бүртгэгдсэн байна.

Анхан шатны шүүхээс 104 хүнд торгох ял, 15 хүнд зургаан сараас нэг жилийн хугацаагаар хорих ял, 12 хүнд зорчих эрхийг хязгаарлах ял, долоон хүнд нийтэд тустай ажил хийлгэх ял, зургаан хүнд хорих ял оногдуулахгүйгээр тэнсэж шийдвэрлэжээ. Дээрх 144 хүнд оногдуулсан эрх хасах нэмэгдэл ялын хувьд 14 шүүгдэгчид нэг жилийн хугацаагаар, нэг шүүгдэгчид нэг жил зургаан сарын хугацаагаар, 69 шүүгдэгчид хоёр жилийн хугацаагаар, нэг шүүгдэгчид  хоёр жил зургаан сарын хугацаагаар, 59 шүүгдэгчид гурван жилийн хугацаагаар хасч шийдвэрлэсэн байна.

Тээврийн прокурорын газраас тээврийн хэрэгсэл жолоодох эрхээ хасуулсан хүн согтуурсан, мансуурсан үедээ тээврийн хэрэгсэл жолоодсон гэмт хэргийн улмаас бусдад 4.5 сая төгрөгийн хохирол учирсныг шүүхийн өмнөх шатанд бүрэн нөхөн төлүүлжээ.