Авлигатай тэмцэх газар, Улсын ерөнхий прокурор, Монгол Улсын Ерөнхий аудиторын АТГ-т мэдүүлсэн ХОМ-ийг энэ удаа онцлон танилцуулъя.

С.МАГНАЙСҮРЭН 263 САЯ ТӨГРӨГИЙН МАЛТАЙ, 97 САЯЫН ХАДГАЛАМЖТАЙ

УИХ-ын дарга Д.Амарбаясгалан Монгол Улсын Ерөнхий аудиторт С.Магнайсүрэнг  нэр дэвшүүлэн, чуулганы хуралдаанаар 2025 оны тавдугаар сарын 8-нд томилсон. Тэрбээр 2019-2023 онд буюу сүүлийн таван жилийн хугацаанд Төрийн нарийн бичгийн даргын албан тушаалаар АТГ-т хөрөнгө орлогоо мэдүүлжээ.

Түүний жилийн нийт орлого нь 62.8 сая төгрөг байна. Тэгвэл гэр бүлийн нийт гишүүдийн орлого нь 66 сая төгрөг гэж 2023 онд мэдүүлсэн байна.

Харин гурван нийтийн орон сууцтай, нэг зуслангийн байшинтай бөгөөд нийт 857 сая төгрөгийн үнэтэй ажээ. Мөн "Mazda" маркийн суудлын автомашинаа 75 сая төгрөгөөр үнэлжээ. Мөн тэрбээр 263 сая төгрөгийн үнэтэй 108 адуу, 12 хурдан удмын адуу, 20 үхэр, 50 хонь, 130 ямаатай гэнэ. Үүнээс гадна хоёр эзэмших болон нэг өмчлөх эрхтэй гурван газраа 30 сая төгрөгөөр үнэлсэн бол 55 сая төгрөгийн үнэт эдлэлтэй гэжээ. Дотоодын банкинд 97 сая төгрөгийн хадгаламжтай, 29 сая төгрөгийн зээлтэй гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр ямар нэгэн компанид хөрөнгө оруулалт хийгээгүй байна.

С. Магнайсүрэн нь 1975 онд төрсөн, 50 настай. 1983-1993 онд Говь-Алтай 1 дүгээр 10 жилийн дунд сургууль, 1993-1997 онд МУИС-ийн Хууль зүйн дээд сургуулийг эрх зүйч мэргэжлээр тус тус төгссөн. Хууль зүйн шинжлэх ухааны магистрын зэрэгтэй. 1997-1999 онд “Улаанбаатар Эрдэм” дээд сургуульд багш, тэнхимийн эрхлэгч, 1999-2000 онд УИХ-ын Тамгын газарт УИХ-ын гишүүний туслах, 2000-2005 онд УИХ-ын Тамгын газарт зөвлөх, 2005-2006 онд Сүхбаатар дүүргийн Засаг даргын тамгын газарт Тамгын газрын дарга, 2006-2007 онд Хүнс, хөдөө аж ахуйн яаманд сайдын зөвлөх, 2007-2008 онд Сангийн яаманд газрын дарга, 2008-2013 онд УИХ-ын Тамгын газарт Тамгын газрын Нарийн бичгийн дарга, 2015 онд Хөдөлмөрийн яаманд Төрийн нарийн бичгийн дарга,  2015-2023 онд Барилга, хот байгуулалтын яаманд Төрийн нарийн бичгийн дарга, 2023-2024 онд Уул уурхай, хүнд үйлдвэрийн яаманд Төрийн нарийн бичгийн даргаар тус тус ажиллаж байсан нэгэн.

З.ДАШДАВААГИЙН ӨӨРИЙН ОРЛОГО НЬ 566 САЯ ТӨГРӨГ БАЙНА

Харин хоёр нийтийн орон сууцтай, нэг зуслангийн байшинтай, гурван авто зогсоолтой бөгөөд нийт 645 сая төгрөгийн үнэтэй ажээ.

Мөн туулах чадвар өндөр "Lexus-350" маркийн суудлын автомашинаа 130 сая төгрөгөөр үнэлжээ. Мөн тэрбээр 965 сая төгрөгийн үнэтэй 10 хурдан удмын адуу, 70 адуу,  650 сайн үүлдрийн үхэртэй гэнэ. Үүнээс гадна нэг эзэмших эрхтэй газраа таван сая төгрөгөөр үнэлсэн бол 55 сая төгрөгийн үнэт эдлэлтэй гэжээ. Дотоодын банкинд 235 сая төгрөгийн хадгаламжтай, 100 сая төгрөгийн зээлтэй гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Хэрлэн Буйлдинг" ХХК-нд хөрөнгө оруулалт хийсэн байна.

Тэрбээр улиран томилогдохдоо "Миний хувьд ирэх зургаан жилд хийх ажлын концепц бол хүнтэй тэмцэхээс илүү тогтолцоо руугаа анхааръя гэж бодож байгаа. Өнөөдөр хуулиас давсан журмууд гаргаад хүнд суртал үүсгэдэг. Хуулиас давсан шийдвэрүүд гаргаад төрийн албан тушаалтан аливаа асуудлыг хүндрүүлдэг асуудлыг УИХ, Засгийн газартай хамтарч ажиллана гэж бодож байгаа. Эхний ээлжид журмуудыг цэгцлэх чиглэлд тодорхой ажлууд хийгээд явж байгаа. Олон нийтээс ч шүүмжилж байгаа нэг асуудал нь та нар акулуудтайгаа тэмцэж чадахгүй жижиг загаснуудаа бариад байна гэдэг. Цаашид үйл ажиллагаагаа сайжруулж ажиллана гэж зорьж байна" гэсэн юм.

УИХ-ын чуулганы ээлжит хуралдаанаар 2025 оны дөрөвдүгээр сарын 8-нд Улсын ерөнхий прокурор Б.Жаргалсайханыг улираан томилох асуудлыг хэлэлцэж, томилсон. Тэрбээр "Би өргөсөн тангарагтаа үнэнч ажиллаж байгаа. Улираан томилох эсэх шийдвэрийг би гаргахгүй. Миний хувьд иргэдийг аль болох цагдан хорихгүйгээр хэргийг нь шийдвэрлэдэг байхаар ажиллаж ирсэн, ажиллаж байгаа. Өөрөө, өөрийгөө би дүгнэхгүй. Мөрдөх байгууллага, ард түмэн намайг хэр ажилласныг дүгнэнэ. Томилгоо дээр нэг зүйлийг ойлгох ёстой. Өнөөдөр Монгол Улсын хэмжээнд 110 гаруй мянган төрийн албан хаагч тангараг өргөн ажиллаж байна. Бид өргөсөн тангарагтаа үнэнч ажиллаж байгаа" гэсэн юм.

Харин нэг нийтийн орон сууцтай, нэг зуслангийн байшинтай бөгөөд нийт 471 сая төгрөгийн үнэтэй ажээ.

Мөн туулах чадвар өндөр "Mercedes Benz-G 500" маркийн суудлын автомашинаа 60 сая төгрөгөөр үнэлжээ. Мөн тэрбээр малгүй, үнэт эдлэлгүй гэнэ. Үүнээс гадна нэг өмчлөх эрхтэй газраа 10 сая төгрөгөөр үнэлсэн бол дотоодын банкинд 278 сая төгрөгийн хадгаламжтай гэж хөрөнгө орлогын мэдүүлэгтээ мэдүүлсэн байна. Тэрбээр ямар нэгэн компанид хөрөнгө оруулалт хийгээгүй гэжээ.