Дайны эхний саруудад олон сая украин хүн Польш руу дүрвэсэн. Польшууд цонхон дээрээ Украины далбааг өлгөх, сайн дурынхан хил дагуу хүнс, хүүхдийн живх, сим карт тараах, зарим нь бүр дүрвэгсдийг гэртээ байрлуулах зэргээр украинчуудад ер бусын халуун дотно хандсан юм.

Гай гамшиг тохиолдсон цаг үед хүн төрөлхтөний эв нэгдлийн үлгэр жишээ болж байсан Польш улсад өнөөдөр энэ нөхцөл байдал үргэлжилсээр байгаа болов уу?

Украины нэг сая орчим дүрвэгч өдгөө Польш улсад толгой хоргодож байна. Дүрвэгчдээс гадна оршин суугчийн статустай хоёр сая орчим украин хүн тус улсад бий. Тэгвэл Польш улс Украины эрх ашгийг хамгаалсан хэвээр байгаа ч дүрвэгчдэд хандах хандлага нь өөрчлөгдсөн бололтой.

Энэ нь тавдугаар сарын 18-нд болох ерөнхийлөгчийн сонгуультай холбоотой. Дүрвэгсдэд туслах нь улс орны эдийн засгийг доройтуулж байгаа тул тэдний эсрэг мөрийн хөтөлбөр гаргах нь илүү их санал цуглуулах нэг арга болжээ. Тухайлбал, нэр дэвшигч Навроцки нэгдүгээр сард “Украин биднийг түнш гэж үздэггүй, олон талаар ёс бус, талархалгүй ханддаг” гэж хэлж байв. Мөн тэрбээр сонгуульд ялбал украинчуудаас илүү польш иргэдийг чухалчлах хууль санаачилна гэж амласан.

Польшуудын украинчуудад туслах хүсэл эрмэлзэл буурсныг сүүлийн үеийн судалгаа ч харуулах болжээ. Тодруулбал, дайны эхний сард польшуудын 94 хувь нь украинчуудад туслахыг дэмжиж байсан бол 2024 оны арванхоёрдугаар сарын байдлаар 57 хувьд хүрч буурсан байна.

Тэгвэл украинчууд эсрэгээр бодож байна. Тэд өөрсдийгөө Польшийн эдийн засагт хувь нэмэр оруулж байгаа гэж үздэг. Польш дахь Украины Элчин сайд Васыл Боднарын хэлснээр одоогоор тус улсад украинчуудын эрхэлж буй 70 мянга орчим бизнес байна.