Хуучин Ленин клуб байрлаж байсан объектын залгаа байршилд зөвшөөрөлгүйгээр барилгын каркас угсарч байсан компанийн барилгыг албадан буулгаж байгаа талаар мэдээлэл өнгөрсөн долоо хоногт маргаан дагуулсан. Тухайн байршилд очиход барилгын ажил явагдаж буй хэсэг газрыг төмөр хашаагаар хашаалсан байх бөгөөд дотогш нэвтрэхгүйгээр нөхцөл байдлыг харах боломжгүй байв. Хашааны гадна том оврын техник хэрэгслүүд, цагдаагийн машин, барилга барьж байсан компанийн төлөөлөл бүхий хүмүүс байх аж. Нийслэлээс тухайн компанийг зөвшөөрөлгүй газар барилга барьсан учраас албадан нурааж байгаа талаар мэдээлсэн. Харин “Оргил МГЛ” ХХК-ийн зүгээс дараах мэдээллийг өгч байв.

"ШҮҮХИЙН ШИЙДВЭР ГАРААГҮЙ БАЙХАД АЛБАДАН НУРААЖ БОЛОХГҮЙ" 

“Оргил МГЛ” ХХК-ийн хувь эзэмшигч Б.Дэлгэрмаа: Нийслэлийн зүгээс иргэдэд маш буруу мессеж өгч байна. Хууль бус газар, нийтийн эзэмшилд зөвшөөрөлгүй барилга барьж байна гэж ойлгуулаад байна. Гэтэл бидэнд бүхий л албан ёсны бичиг баримт байна. Энэ газрыг буулгахад 1.3 тэрбум төгрөг улсаас төсөвлөсөн байна. Энэ бол татвар төлөгчдийн мөнгө. Та бүхэн ороод харах юм бол барилгын каркасыг энд тэндээс нь эмтэлж нураасан байгаа. Хүний эд хөрөнгийг дураараа сүйтгэж болох юм уу? Аливаа маргаантай асуудал шүүхийн шийдвэрийн дагуу байх ёстой. Гэтэл шүүхийн шийдвэр гараагүй байна шүү дээ. Шүүх шийдтэл энд хэн ч гар хүрч, ямар нэгэн үйл ажиллагаа явуулах ёсгүй гэх байр суурийг илэрхийллээ.

"4 ЖИЛИЙН ӨМНӨӨС ТОДОРХОЙГҮЙ ШАЛТГААНААР БАРИЛГЫН ҮЙЛ АЖИЛЛАГААГ ЗОГСООСОН"

“Оргил МГЛ” ХХК-ийн хувь эзэмшигч Б.Дэлгэрзаяа: Манай “Оргил МГЛ” ХХК албан ёсны компанийн гэрчилгээтэй, газрын гэрчилгээтэй, нийслэл, Хот байгуулалт, барилга, орон сууцжуулалтын яам гээд барилга барихад шаардлагатай бүхий л бичиг баримтуудыг шат шатны газруудаас хууль дүрмийн дагуу аваад барилгын ажлаа хийж гүйцэтгээд явж байсан. Дөрвөн жилийн өмнөөс тодорхойгүй шалтгаанаар барилгын үйл ажиллагааг зогсоосон. Үүнийг захиалгатай хэрэг гэж үзэж байгаа. Энэ жилээс бид барилгын ажлаа эхлэх гээд явж байсан боловч нийслэлээс барилгын ажлыг цуцлах захирамж гарсан. Тэгэхдээ тухайн захирамжийг бид нарт албан ёсоор гардуулаагүй, мэдэгдээгүй байж цагдаа, хүчний байгууллагыг оролцуулан албадан нурааж байна. Өнөөдрийн байдлаар бидэнд газрын зөвшөөрөл цуцалж байгаа албан ёсны захирамжаа танилцуулаагүй, ямар шалтгаанаар, яагаад гэдэг албан тоотоо өгөөгүй байна. Шуудангаар илгээсэн гэдэг тайлбар хэлээд л аль хэдийн суурь нь цутгагдчихсан в1,в2, нэг давхар хүртлээ босчихсон барилгыг нураах үйл ажиллагаа явуулж байна.

Энэ хэний тушаал юм бэ гээд асуухаар Х.Нямбаатар дарга үүрэг өгсөн гэдэг хариулт хэлж байна.

Үүнийг ээлжит хувийн хэвшлүүд рүү дайрдаг, өмчийг нь булааж авдаг үйл ажиллагааны нэг хэлбэр юм болов уу гэж харж байна гэлээ. Тус компанийн хувьд тухайн газар дээрээ үйлчилгээний зориулалт бүхий барилга барьж байсан гэх тайлбарыг өгч байгаа юм. Үйлчилгээний төвийн бүтээн байгуулалт долоон жилийн өмнө эхэлсэн ба одоог хүртэл баригдаагүй, үйл ажиллагааг нь санаатай зогсоосон талаар “Оргил МГЛ” ХХК-ийн зүгээс хэлж байлаа. Хэрэв барилгын үйл ажиллагаа зогсоогүй бол тухайн үйлчилгээний төв хоёр жилийн өмнө ашиглалтад орох байж. Тухайн компанийн хувьд өөр олон газар барилгын чиглэлээр үйл ажиллагаа явуулж байсан гэх ба өнөөдрийг хүртэл хэвийн үйл ажиллагаагаа үргэлжлүүлж байгаа юм байна.

"ТУС КОМПАНИЙН БАРИЛГА БАРИХ ЗӨВШӨӨРЛИЙГ ХҮЧИНГҮЙ БОЛГОСОН"

Сүхбаатар дүүргийн 1 дүгээр хороонд төв талбайн урд байрлах хуучин Ленин клубын барилгыг 1929 онд барьж ашиглалтад оруулсан. Хамгийн сүүлд 2006 онд барилгын доорх газар 10610 ам.метр талбайгаар бүртгэгдэж, 2018 оноос хойш үйл ажиллагаа эрхлэгч, газрыг ашиглагчдад цөөнгүй өөрчлөлт орж эхэлсэн байдаг. Тухайн компанийн барилгыг буулгах газарт НЗДТГ-ын дарга Д.Амгалан болон холбогдох албаныхан  ажиллажээ. Ингэхдээ дараах тайлбарыг өгсөн байна.

"Хуучин Ленин клубын газар ОХУ-ын өмчийн үл хөдлөх хөрөнгөд бүртгэлтэй байсныг залилж, тухайн газраас хууль бусаар эзэмшсэн байж болзошгүй асуудалд Эрүүгийн хэрэг үүсгэн, хэрэг хянан шийдвэрлэх ажиллагаа явагдаж байна. Уг асуудалтай холбогдуулан хуучин Ленин клуб байрлаж байсан объектын залгаа байршилд зөвшөөрөлгүйгээр барилгын каркас угсарч байсан “Оргил МГЛ” ХХК-ийн барилгыг албадан буулгаж, газрыг чөлөөлж байна.

Тодруулбал, “Оргил МГЛ” ХХК-ийн эзэмшилд хууль бусаар орсон 748 ам.метр талбайг чөлөөлөх тухай гурван шатны шүүхийн шийдвэр гарсан бөгөөд тус компанийн барилга барих зөвшөөрлийг хүчингүй болгосон зэрэгт үндэслэн барилгын каркасыг албадан нурааж, газрыг чөлөөлж байгаа юм. 2017 онд иргэн Б.Дэлгэрмөрөнгөөс 322 ам.метр газрыг “Оргил МГЛ” ХХК-д газар эзэмших эрх шилжүүлж шийдвэрлэсэн, мөн газрын талбайн хэмжээг нэмэгдүүлсэн зэрэг асуудлыг мөн хууль хяналтын байгууллагаар шалгуулж байна" гэлээ.

"ШҮҮХ ХУРЛЫН ТОВОО ХҮЛЭЭЖ БАЙНА" 

Газрын маргаантай холбоотой асуудалд “Оргил МГЛ” ХХК-ийн зүгээс "хоёр улсын хоорондын өмч, хөрөнгөө бүртгэх үйл ажиллагаа 2019 онд цэгцэрсэн. ОХУ-ын бүртгэгдсэн газар кадастрын зурган дээрээ манай барилга барилга барьж буй газраас гадуур байгаа. Манай газар үүнтэй огт хамааралгүй. Тусдаа бид газар өмчлөх хуулийн дагуу 10 гаруй жилийн өмнө үл хөдлөх хөрөнгийн гэрчилгээгээ авсан. Нийслэлийн зүгээс газар давхацсан гэж ярьж байгаа. Хэний ямар газартай давхацсан нь ямар ч тодорхойгүй. Бид хууль ёсны өмчлөгч байхад өөр хэн байгаа юм бэ?. Хэлээд байгаа шалтгаанаа нотлох нэг ч бичиг баримт байхгүй байна шүү дээ. Газар давхцаад байна гээд бидэн дээр ирэх өөр иргэн байна уу? Байхгүй байна шүү дээ. Өнөөдөр бид хэнтэй маргаж байна вэ гэхээр төрийн хууль, хүчний байгууллагууд, нийслэлийн дарга нартай л маргаж байна.

Монгол Улсад иргэн хүн өөрийн гэсэн өмч, хөрөнгөтэй байж болохгүй юм байна. Төрийн өндөр албан тушаалтнууд л хөлжиж байх ёстой гэдгийг харлаа. Шударгаар бизнес эрхлээд хөдөлмөрлөж байгаа хүмүүс хотын төвд барилга барьж болохгүй юм байна. Том зургаар харахад ТҮЦ-нүүдийг яаж буулгасан яг түүн шиг л үйл явдал боллоо" гэв.

Одоогоор шүүхийн шийдвэр эцэслэгдэж гараагүй байгаа учраас хууль хүчний байгууллагын ажилчдыг татан аваад байгаа юм байна. Шүүхийн процесс ямар үндэслэлээр, ямар шатанд явж байгааг тодруулахад "Газрын маргаан гэж ойлгож болно. Шүүх хурал хэд хэдэн шат дамжлагатай явах байх. Одоогоор шүүх хурлын анхны хэлэлцүүлэг ч зарлагдаагүй байна. Бид шүүхэд хандчихсан, хэрэг үүссэн байгаа. Тиймээс шүүх хурлыг товоо хүлээж байна" гэлээ.

Барилгын гүйцэтгэгч компанийн зүгээс өнөөдрийг хүртэл тухайн газар дээр 2020 оны ханшаар 2.8 тэрбум төгрөгийн бүтээн байгуулалт хийсэн гэдгийг хэллээ.

Гэрэл зургийг Л.Энх-Оргил