Казахстаны Астана хотноо өнөөдөр/2025.05.10/ "CS2" төрлийн "PGL Astana 2025" тэмцээн эхэллээ. 625 мянган ам.долларын шагналын сантай тус тэмцээнд дэлхийн шилдэг 16 баг оролцож байгаа бөгөөд Монголын "The MongolZ" баг чансаагаараа өрсөлдөж байна.

Энэ тэмцээнд энэ жил дийлдэшгүй байгаа Францын "Vitality" оролцохгүй.

Тэд тэмцээний эхний тоглолтоо 16:00 цагаас Бразилын "FURIA" багийн эсрэг хийнэ. Хоёр баг нийт дөрвөн удаа учраа таарахад "The MongolZ" гуравт нь хожиж байжээ. Хоёр баг сүүлд сарын өмнө "PGL Bucharest 2025" тэмцээний хүрээнд учраа таарахад Монголын баг 2-0 гэсэн харьцаатай хожсон аж.

Энэхүү тэмцээний түрүүлэх хамгийн өндөр магадлалтай багуудын нэгээр "The MongolZ"-ийг нэрлэж байна. Гэхдээ өнөөдөр тэмцээний шууд дамжуулалтын үеэр Энэтхэг гаралтай "CS2"-ийн алдарт тайлбарлагч, аналист "Bleh" буюу Судхен Вахенбам нэгэн сонирхолтой зүйлийн талаар ярив. Түүний хувьд саяхан Улаанбаатар хотноо болсон "MESA Nomadic Masters" тэмцээнд ажиллаад Астанаг зорьжээ.

Тэрбээр ярихдаа "Би өнгөрсөн долоо хоногт Монголд MESA-ийн арга хэмжээнд оролцсон. Монголоос шинэ залуу тамирчид, багууд гарч ирж байна. Хэрэв The MongolZ ирэх Остин Мэйжорт амжилт гаргаж чадахгүй бол бүрэлдэхүүндээ өөрчлөлт хийх байх. Ялангуяа Techno4k-г яримаар байна. Би түүнийг үргэлж өмгөөлсөөр ирсэн. Blitz тэр хоёрыг сүүлийн 3-4 жил л хамгааллаа. Гэхдээ улам л муудаад байна. Миний хувьд The MongolZ-ийн бүрэлдэхүүнд өөрчлөлт орох эсэх нь хавцлын ирмэг дээр байна. Остин Мэйжорын үр дүн энэ бүгдийг шийднэ" гэжээ.

The MongolZ баг хамгийн сүүлд 2024 оны арваннэгдүгээр сард тэмцээнд түрүүлжээ.