ОХУ нефть, байгалийн хийн экспортод тавьсан хориг арга хэмжээнээс зайлсхийхийн тулд сүүдрийн флот ашигладаг гэдэг. Тэгвэл Их Британи улс Оросын газрын тос тээвэрлэгч сүүдрийн флотын 100 хүртэлх хөлөг онгоцны эсрэг хориг арга хэмжээ авна гэдгээ мэдэгдлээ. Эдгээр хөлөг онгоцоор 2024 он гарснаас хойш 18 тэрбум фунт стерлингээс илүү үнийн дүнтэй ачаа тээвэрлэжээ.

Их Британийн ерөнхий сайд Кейр Стармер энэ талаар мэдээлэхдээ "Путины сүүдрийн флотыг ажиллагааг таслан зогсоож, газрын тосны орлогоос хамаардаг дайны машиныг нь үгүй хийх, далайн доорх дэд бүтцийг хамгаалахын тулд чадах бүхнээ хийнэ" гэв.

ОХУ-ын сүүдрийн флотын хөлгүүдийг хуучирсан, бас аюултай гэж Их Британи үзэж байна. Мөн эдгээр хөлөг онгоц аюултай маршрутаар явдаг гэлээ. Балтийн тэнгис дэх томоохон кабельд гэмтэл учирсан тухай мэдээлэлтэй энэ нь холбоотой.

Хориг арга хэмжээнд хамрагдсан хөлөг онгоцуудыг Британийн боомтуудад нэвтрүүлэхийг хориглоно.

Их Британийн ерөнхий сайд Кейр Стармер тавдугаар сарын 8-9-ний өдрүүдэд Норвегийн Осло хотноо болсон Хамтарсан экспедицийн хүчний хурлын үеэр энэ мэдэгдлээ хийжээ. Хамтарсан экспедицийн хүчинд Дани, Норвеги, Нидерланд зэрэг 10 улс багтдаг. Их Британи өмнө нь 2024 оны арванхоёрдугаар сард болсон Хамтарсан экспедицийн хүчний хурлын үеэр сүүдрийн флотын 133 хөлөг онгоцны эсрэг хориг арга хэмжээ авчээ.