"BTS" хамтлагийн шүтэн бишрэгчдэд зориулсан арга хэмжээний үеэр нэгэн япон эмэгтэй хамтлагийн гишүүн Жингийн хацар дээр үнссэн нь буруутаж, байцаалтад дуудагдсан. Энэ үйл явдал 2024 оны зургадугаар сарын 13-нд буюу Жинг цэргээс халагдсаны маргааш болсон билээ. 1000 шүтэн бишрэгч оролцсон үнэгүй тэврэлт гэх арга хэмжээний үеэр 50 гаруй насны япон эмэгтэй Жин буюу Ким Сок Жиний хацар дээр үнссэн аж.

Тус эмэгтэйн мөрдөн байцаалтын ажиллагааг түр түдгэлзүүлснийг Өмнөд Солонгосын Сөүл хотын Сонгпа цагдаагийн газар өнгөрсөн гуравдугаар сарын 31-нд мэдэгдээд байв. Учир нь сэжигтэн хилийн чанадад хоёр сараас дээш хугацаагаар байгаа тохиолдолд мөрдөн байцаалтын ажиллагааг үргэлжлүүлэхэд хүндрэлтэй тул ажиллагааг түр зогсоох цагдаагийн журам байдаг.

Тэгвэл Жинг хүчээр үнссэн гэх тухайн эмэгтэй саяхан Өмнөд Солонгост ирж, өөрөө сайн дураараа цагдаа дээр очжээ. Тиймээс түүний хэргийг прокурорт шилжүүлээд байна. Өнгөрсөн хугацаанд Өмнөд Солонгосын цагдаа нар Интерполоор дамжуулан Японы цагдаа нараас хамтран ажиллахыг хүсч, эмэгтэйн хэн болохыг тогтоожээ.