Хойд Солонгосын эрх баригчид Оросын төлөө тулалдаж байгаад амь үрэгдсэн цэргүүдийн ар гэрийнхэнд нийслэл Пёньян руу нүүх эрх олгожээ. Мөн амь үрэгдэгсдийн дурсгалд зориулж хөшөө босгоно гэж мэдэгдэв. Нас барагсдын төрөл төрөгсөд дэглэмийг шүүмжлэх магадлалтай тул ийм шийдвэр гаргасан гэж үзэж байна. Нийслэл рүү нүүх зөвшөөрөл олгох нь Ким Жон Уны авторитар дэглэмийн хувьд нэр төрийн хэрэг юм.

Зарим шинжээчийн үзэж буйгаар нас барагсдын гэр бүлүүдийг нэг дор төвлөрүүлэх нь тулааны нөхцөл байдал болон хохирол амссан тухай аливаа цуу ярианы тархалтаас зайлсхийх нэг арга.

Хойд Солонгосын эх сурвалжийн мэдээлснээр тэдэнд Соншин, Хвасон дахь шинээр баригдсан хороололд байр өгөх аж. Хойд Солонгосын нийгэмд зөвхөн элитүүд л тэнд амьдрах боломжтой. Тэр байтугай нийслэл рүү нэвтрэх зөвшөөрөл ч хязгаарлагдмал байдаг тул Пёньянд амьдрана гэдэг асар их аз завшаан болохыг Өмнөд Солонгосын дипломатч асан, тагнуулын албаны ахлах ажилтан Рах Жон-Йил хэлжээ.

Хойд Солонгосчууд Оросын нэрийн өмнөөс тулалдаж байгаа тухай мэдээлэл 2024 оны аравдугаар сард анх гарсан. Цуу яриа эртнээс гарсан ч гэлээ Хойд Солонгосын төрийн мэдлийн хэвлэлүүд дөрөвдүгээр сарын 28-нд л сая албан ёсоор зөвшөөрсөн мэдэгдэл хийсэн юм. ОХУ-ын удирдагч Путин ч Хойд Солонгосын цэргүүдийн оролцоог баталж, тэднийг эв нэгдэл, шударга ёс, жинхэнэ нөхөрлөлийн үүднээс тулалдсан хэмээн магтан сайшаажээ.