Ялалтын баярыг дайн дажингүй тэмдэглэхийн тулд Москвагийн цагаар 2025 оны тавдугаар сарын 8-ны 00:00 цагаас эхлээд 72 цаг гал зогсоох зарлигийг ерөнхийлөгч Путин өнгөрсөн сард зарласан. Гэвч гал зогсоох цаг эхлээд гурван цагийн дотор ОХУ-ын арми Украины хойд хэсгийн Сумы хотын чиглэлд бөмбөг хаясан гэж Украины Агаарын цэргийн хүчин мэдэгдэв.

Богино хугацааны эвлэрлийг анх зарлахад Украин татгалзсан. Украины ерөнхийлөгч Зеленский Путины мэдэгдлийг театрын үзүүлбэр гэж нэрлээд, АНУ-ын санал болгосон 30 хоногийн гал зогсоох хэлэлцээг дэмжиж буйгаа дахин мэдэгдсэн юм.

Украины арми гал зогсоох 72 цагийн хугацаанаас өмнөхөн Москва руу нисгэгчгүй нисэх онгоцоор халдсан тул Оросын эрх баригчид нийт 13 нисэх онгоцны буудлын хөдөлгөөнийг түр хаасан. Эдгээрийн дөрөв нь Москвагийн нисэх онгоцны буудал бол ес нь өөр хотуудынх юм. Баасан гаригт болох парадад оролцохоор олон улсын удирдагч, төлөөлөгчид Москваг зорьж буй эгзэгтэй цаг үед ийнхүү нисэх буудлууд хаагдсан нь Оросыг эвгүй байдалд оруулж болзошгүй явдал юм.

Зочдын жагсаалтад гадаадын улсын 29 удирдагч багтсан. Үүнд, Бразилын ерөнхийлөгч Луиз Лула, Вьетнамын ерөнхийлөгч То Лам, Беларусийн удирдагч Александр Лукашенко нар багтана.