АНУ-ын ерөнхийлөгч асан Жо Байден албан тушаалаас бууснаас хойших анхны ярилцлагаа Даваа гаригт /2025.05.05/ "BBC"-д өгчээ. Ерөнхийлөгчийн сонгууль болохоос дөрвөн сар хүрэхгүй хугацааны өмнө Байден өрсөлдөөнөөс нэрээ татсан. Энэ нь хэцүү боловч зөв шийдвэр байсныг тэр дурссан байна.

Орос, Украины дайны талаар тэрбээр "Трампийн засаг захиргаа Орост газар нутгаасаа өгөхийг Украинаас шаардаж байгаа нь орчин үеийн тайвшруулах арга. Путин Украиныг Оросын газар нутгийн нэг хэсэг гэж бодож байгаа. Зарим газар нутгийг хэлэлцээрийн хүрээнд Орост өгчихвөл Путин зогсоно гэж бодож байгаа хүмүүс тэнэг л байна даа. Дональд Трампийн удирдлага дор АНУ-Европын харилцаа муудаж буйд санаа зовж байна. Энэ бүхэн орчин үеийн дэлхийн түүхийг өөрчлөх болно. Европын удирдагчид АНУ-д итгэж болох эсэхээ мэдэхгүй, одоо бид яах вэ гэж байгаа.

Дарангуйлагч, дээрэмчин хүн өөрийн мэдлийн биш газар нутгийг авахаар шийдсэнийг хүлээн зөвшөөрч болно гэж бодож байгаа хүмүүсийг ойлгохгүй байна. Хэрвээ Украин газар нутгаасаа өгч таарвал Оростой хиллэдэг НАТО-ийн зарим орон энэ жишигээр явна гэж магадгүй" гэсэн юм.

Харин Панамын суваг, Гренланд, Канадыг өөртөө нэгтгэх гэсэн Трампийн оролдлогын талаар түүнээс асуухад "Ямар чөтгөр нь болоод байна даа? Ямар ерөнхийлөгч гэхээрээ ийм юм ярьдаг байна? Бид ийм биш шүү дээ. Бид чинь эрх чөлөө, ардчилал, боломжийн төлөө зогсох ёстой болохоос хурааж авдаг, цөлмөдөг хүмүүс биш" гэжээ.

Эцэст нь түүнээс Трамп 2.0 эринг хэрхэн дүгнэж байгааг асуухад "Түүх үүнийг харуулна. Би одоогоор тийм ялгуусан зүйл олж хараагүй л байна" гэсэн юм.

Трампийн хувьд Байдены үед үзүүлсэн цэргийн тусламжийг шүүмжилсэн байр суурьтай байдаг. Тэрбээр "Зеленский Байденаар хуур хөгжим шиг л тоглосон" гэж хэлж байв.