Сан Францискогийн булангийн Алькатрас арал нэгэн цагт алдартай шорон байв. "Хад" гэх нэрээр танигдсан Алькатрас арлыг олон 10 жилийн турш шорон зориулалтаар ашиглаагүй бөгөөд өдгөө жил бүр сая сая жуулчин татдаг түүхэн газар болж хувирчээ.

Тэгвэл АНУ-ын ерөнхийлөгч Дональд Трамп Алькатрасыг дахин шорон зориулалтаар ашиглалтад оруулах төлөвлөгөөтэй байна. Тус шоронд аюултай хоригдлуудыг дахин байрлуулах, АНУ-ын хууль, дэг журмыг сахиулах бэлгэ тэмдэг болгон дахин ашиглах боломжтой гэж Трамп үзжээ.

Гэхдээ нэгэн цагт сүрлэг байсан шоронгийн буурийг дахин сэргээх нь бодит байдал дээр амар ажил биш гэдгийг шинжээчид хэлж байна.

Алькатрас арал нь Сан Францискогийн эргээс хоёр км зайд оршино. Анх тэнгисийн цэргийн хамгаалалтын цайз болгон барьсан тус байгууламжийг 20 дугаар зууны эхэн үед цэргийн шорон болгон сэргээжээ. Улмаар 1934 онд "Алькатрас Холбооны хорих анги" нэрийн дор албан ёсоор холбооны шорон болсон. Сан Францискогийн булангийн хүчтэй урсгал, хүйтэн температурын улмаас хоригдлууд оргон зайлах бараг боломжгүй байсан нь Алькатрасын онцлог. Тус шоронд Аль Капоне, Микки Коэн нарын зартай ялтнууд хоригдож байв.

1979 онд Клинт Иствудын тоглосон "Алькатрасаас оргосон нь" кино гарснаар тус шорон улам алдартай болжээ. Дараа нь Шон Коннери, Николас Кэйж нарын тоглосон "Хад" кино 1996 онд гарсан. Тус кинонд мөн л Алькатрасаас оргож буй талаар гардаг.

Гэвч Алькатрасын үйл ажиллагааны зардал холбооны бусад байгууллагаас гурав дахин илүү байсан тул эцэст нь 1963 онд хаагджээ. Одоогоор тус шорон арлыг Үндэсний цэнгэлдэх хүрээлэнгийн үйлчилгээний алба хариуцан музей байдлаар ажиллуулдаг. Жил бүр 1.4 сая гаруй хүн Алькатрасыг зориж байна.