Европын холбооны орнууд 2027 оны эцэс гэхэд Оросын бүх хий, шингэрүүлсэн хийн импортыг зогсоох хууль эрх зүйн арга хэмжээ авах гэж байна. Хуулийн төслийг зургадугаар сард танилцуулахаар төлөвлөж байна. ОХУ-аас Украинд халдан довтолсны дараа Европын холбооны орнууд байгалийн хийн топ нийлүүлэгчээсээ татгалзаж, олон 10 жилийн хамааралтай байдлаа дуусгах амлалт өгсөн билээ.

Хууль хэрэгжихийн тулд мэдээж Европын холбооны 27 орны зөвшөөрөл шаардлагатай.

2027 оны эцсээр хэрэгжих арга хэмжээнээс өмнө энэ оны сүүл гэхэд Оросын байгалийн хийг тодорхой гэрээ, нөхцлөөр импортолдог болох хориг арга хэмжээг төлөвлөж байна. Уг хоригийг ч бас ирэх сард танилцуулна.

Европын холбооны Эрчим хүчний комиссар Дэн Йоргенсен хэлэхдээ "2022 оны хоёрдугаар сараас хойш бид Оросоос түлш худалдаж авахад Украинд өгсөн тусламжаасаа ч илүү их мөнгө зарцуулжээ. Мэдээж ийм зүйл байж болохгүй" гэсэн юм. Өдгөө Орос, Украины энхийн хэлэлцээрийн асуудал яригдаж буй. Гэвч энхийн хэлэлцээр байгуулсан ч гэлээ цаашид Оросын импортод найдах нь ухаалаг бус хэрэг гэдгийг тэр хэллээ.

"Оросын эрчим хүчнээс татгалзаж байгаа нь Европын холбооны ашиг сонирхлын эсрэг үйлдэл" гэж Кремлийн хэвлэлийн төлөөлөгч Дмитрий Песков хэлжээ. Тэрбээр "Европын холбоо АНУ болон бусад орны илүү үнэтэй барааг илүүд үзэж, өрсөлдөөний орчныг алдагдуулж байна. Европын дараагийн үеийн улстөрчид нөхцөл байдлыг илүү ухаалаг дүгнэнэ гэж найдаж байна" гэжээ.

Европын хэрэглээний байгалийн хийн 19 хувь орчим нь Оросын импортод түшиглэж байна. Энэ нь дайнаас өмнөх үеийг бодвол 45 хувь буурсан үзүүлэлт юм. Өдгөө Европын холбоо АНУ-аас шингэрүүлсэн байгалийн хийгээ авахаар эрмэлзэж байна.