Г.Лувсанжамц

УИХ-ын гишүүн

-Цахилгааны үнэ нэмсэнтэй холбоотойгоор цаашдаа төлөвлөж байгаа ажлуудтай холбоотойгоор асуулт асууя. Гэр хорооллын иргэдэд дулаан алдагдал, тог цахилгаанаа хэмнэх талаар зөвлөмж өгөх ажлыг зохион байгуулсан гэж байна. Бодитоор хэдэн өрхөд зөвлөмж өгсөн бэ. Гурван тарифтай тоолууртай өрх хэд байгаа вэ. Бид эрчим хүчний үнийг нэмсэн. Эсрэгээрээ цахилгаанаа хэмнэх заавар зөвлөгөөг эрчимтэй хийх ёстой. Утааг үнэхээр бууруулъя гэвэл байшингаа дулаалаад цахилгаанаа хэмнэж байгаа хүмүүсийг дэмжих ёстой. Намар хүртэл ямар ажлыг зохион байгуулах вэ. Ялангуяа дулаан цагаар дулаалгын асуудлаа шийдэх хэрэгтэй. Хоёрт, төр засгийн хамгийн том үүрэг бол тодорхой байх явдал. Тодорхойгүй байгаагаас болоод гэр орноо дулаалж чаддаггүй, модоо тарьж чаддаггүй, нүхэн жорлонгоо био жорлон болгож өөрчилж чаддаггүй. Төлөвлөлтийн гол зорилго бол тодорхой мэдээллээр иргэдээ хангах хэрэгтэй. Найман дүүрэгт 422 төрлийн техникийн шинэчлэл хийнэ гэсэн төлөвлөгөө байна. Аль хороодод ийм шинэчлэл хийх вэ. Яг аль хороодод 2025 оны өвөл цахилгаан тасрахгүй байх вэ. Нийт хэдэн өрх байгаа вэ. Энийг нийслэлийн хөгжлийн ерөнхий төлөвлөгөө-2040 уялдуулж өгсөн үү. Эрчим хүчний яам мэдээлэл өгөхгүй байна гэдэг тайлбарыг хэлдэг. 

Ерөөсөө попроод байгаа юм байхгүй сайд аа. Хаана нь тасрах юм, хаана нь тасрахгүй юм бэ гэдгээ тодорхой гаргах ёстой ш дээ. Байшингаа дулаалаад гэрээ дулаалаад цахилгаан халаагуурт шилжчих. Энэ хэсэгт цахилгаан таслахгүй гэдгээ тодорхой хэлэх хэрэгтэй л гэж хэлээд байна. Нийтээрээ тог цахилгаан таслахаа боль гэдэг асуудлыг хэлээгүй. Талбай дээрх үзэсгэлэнг өнөөдөр үзлээ. Улсын хэмжээний л юм байхаас Улаанбаатар хотод аль хороонд тог тасрахгүй юм бэ гэдэг төлөвлөгөө байх ёстой шүү дээ. Хоёрт, 2026 оноос өмнө 440 мянган хэрэглэгчийг ухаалаг тоолуурт шилжүүлэх төлөвлөгөө байгаа гэнэ. Энийгээ л тодорхой болгоё гээд байгаа юм. 

Б.Чойжилсүрэн

Эрчим хүчний сайд

-Гэр хорооллын айл өрхийг дулаалах зөвлөмжийг үе үеийн Эрчим хүчний яамнаас өгч ирсэн. Түгээх сүлжээнүүдээс ч өгч байсан. Бид ард түмэндээ зоригтой үнэнийг хэлж чадахгүй байна. Сүүлийн үед гэр хороололд барьсан монгол гэрт ч тэр хувийн орон сууцанд ч тэр ямар нэгэн стандарт гэдэг юм байхгүйгээр 360 гаруй жил явж өнөөдөрт ирсэн. Үүнээс шалтгаалаад хүндрэлүүд гарсан. Мөн дулааны үнийг хэт доогуур бариад байхаар дулаалах сонирхолгүй байна. Хэт хямд өртөгтэй учраас. Зах зээлийн үнэд очвол дулаалгаа сайн хийнэ. Хямд дулаанаараа дулаалахгүй байсан нь хэрэглэгчдэдээ ашигтай байна. Улаанбаатар хотод 2031-2032 онд эрчим хүчний эх үүсвэр барихад 2 тэрбум ам.долларын хөрөнгө оруулалт хэрэгтэй гэдэг тооцоолол хийсэн. Хамтарсан ажлын хэсэг гарч, эхний нэг тэрбум ам.долларын санхүүжилтын эх үүсвэрийг олж, хэлэлцээрийг хийж байна. Азийн дэд бүтцийн хөрөнгө оруулалтын банк сая Монголд ирж уулзсан. Эхний 900 сая ам.долларын Азийн дэд бүтцийн хөрөнгө оруулалтын банкнаас гаргаж, Монголын тал 100 сая ам.долларын санхүүжилтыг шийдсэн тохиолдолд 35 хүртэлх жилийн хугацаатай, жилийн 3.2 хувийн хүүтэй, юаниар төлөх бөгөөд эхний эргэн төлөлтөөс чөлөөлөгдөх хугацааг дор хаяж таван жилээс багагүй хугацаанд байхаар шийдэхээр ярьж байна. Засгийн газрын баталгааны орон зай хүрвэл үлдэж байгаа нэг тэрбум ам.долларыг босгох боломж манай яаманд байна. Бид чадна. Ийм л байна.

Орчны бохирдлыг бууруулах үндэсний хороог 2023 он дуустал би толгойлж явсан. Гэтэл нийслэлийн агаарын бохирдлыг хотын дарга хариуцах шийдвэр гаргасан. Тиймээс нийслэлээс энэ зөвлөмж өгөх асуудлыг хариуцдаг. Танд нийслэлээс илүү мэдээлэл өгөх болно. 

Цахилгаан тасрахгүй байна гэж байхгүй Г.Лувсанжамц гишүүн ээ. Одоо бид нэг эх үүсвэртэй. Хоёр эх үүсвэртэй болтол 30, 40 жилийн асуудал болно.

Тог бага тасрах тухай л ярина. Огт тасрахгүй гэсэн ойлголт байхгүй. Тог тасрахгүй байхын тулд хоёр эх үүсвэртэй байж таарна аа даа. Нэг талд нь үйлчилгээ хийхэд нөгөө талаа сэлгэн залгадаг байх ёстой. Сүүлийн 30 жилийн хугацаанд төлөвлөлтгүй явсан Улаанбаатар хотын гэр хороололд ийм боломж байхгүй. Тэгж худлаа ярьж ард түмнийг молигдож хэрэггүй, чадахгүй. Бага тасрах тухай ярина. Намар, өвлийн бэлтгэл ажил хийгээд явсан. Монгол даяараа л зарлаж байгаад цахилгаан хязгаарлаж, засвар үйлчилгээгээ хийнэ гэдгээ зарлаж байгаа.