ОХУ-ын ерөнхийлөгч Владимир Путины Кремль дэх хувийн сууцаа танилцуулсан бичлэг Ням гаригт олны хүртээл болжээ. Энэ нь түүний засгийн эрхэнд гарсан 25 жилийн ойг харуулсан баримтат киноны нэг хэсэг юм. Бичлэгээс харвал Австралиас авчирсан 200 фунт стерлингийн үнэтэй холигч, Туркээс авчирсан 400 фунт стерлингийн үнэтэй кофе чанагч зэрэг үнэтэй эд зүйлсийг харуулжээ. Мөн төхөөрөмжөөр дүүрэн дасгалын заал, костюмаар дүүрэн хувцасны өрөө зэргээ харуулсан байна.

Түүнчлэн Путины гэрт Оросын эзэн хаан III Александрын том хөрөг зураг байжээ. Сонирхолтой нь 19 дүгээр зууны сүүл үеийн Оросыг захирч байсан III Александр хаан дэлхий дахинд "Энхийг сахиулагч" гэдгээрээ танигдсан нэгэн билээ.

Сэтгүүлч түүнийг "Тайван, нухацтай дүр төрхтэй харагддаг. Гэхдээ хэн нэгнийг цохиод авмаар санагддаг уу" гэж асуухад, "Үргэлж тэгдэг. Гэхдээ үүнтэйгээ тэмцдэг" гэж хариулжээ.

Путины хувийн амьдрал өндөр нууцлалтай байдаг. Гэтэл тэр ийнхүү сэтгүүлчдэд үүдээ нээсэн нь өөрийгөө хувь хүн талаас нь илүү гэгээлгээр харуулахыг хүссэний илрэл юм. Тэр өөрийгөө бусдын адил байдаг л улстөрч биш, харин энгийн иргэдийн асуудлыг ойлгодог гэж харуулахыг хүсчээ. Тэрбээр "Би сая сая орос хүмүүстэй адил л агаараар амьсгалж байгаа" гэсэн юм.