Зам тээврийн сайд Б.Дэлгэрсайхан “Монголын төмөр зам” төрийн өмчит хариуцлагатай компанийн газрын дарга нарыг чөлөөлөх шаардлагыг хүргүүлжээ.

Халаа сэлгээнд энэ удаа тус компанийн Худалдан авах ажиллагааны хэлтсийн дарга Г.Батсүлд, Тээвэр ложистик төлөвлөлтийн газрын дарга Г.Шижирбаатар, Хөдлөх бүрэлдэхүүний газрын дарга Д.Нямлхагва нар өртөж, тойрохоо зуруулах болсон мэдээлэл “Монголын төмөр зам” ТӨХК-ийг донсолгож байна.

Монгол Улс экспортын төмөр замтай болох зорилгыг далимдуулан “Монголын төмөр зам” ХХК, “Тавантолгой төмөр зам”ТӨХК-ийн дарга нарынх нь тансаглал хэрээс хэтэрч буй тухай дуулиан шуугиан өнгөрсөн хугацаанд чих дэлдэж ирсэн. Тэгвэл салбарын сайд ч энэхүү дуулианы хажуугаар өнгөрөөгүй бололтой. Төрийн өмчид хайр найргүй хандсан байж болзошгүй зарим үйлдлийг хуулийн байгууллагаар шалгуулахаа  ч мэдэгдсэн юм байна.

Ижил чиг үүрэгтэй төрийн өмчит аж ахуй нэгжүүдийг нэгтгэх замаар ажлын давхардлыг арилгаж, үргүй зардлуудыг бууруулах зорилтыг Засгийн газар тавьсан. Энэ хүрээнд “Монголын төмөр зам” ТӨХК, “Тавантолгой төмөр зам” ХХК-иудыг нэгтгэхээ салбарын сайд өнгөрсөн өвөл мэдэгдэж, судалгааг эхлүүлснээ зарласан. Тэгвэл судалгаа ч дууссан төдийгүй зарим нэг зөрчлүүдийг харгалзан ийнхүү халаа сэлгээг “Монголын төмөр зам” компаниас эхлүүлэхээр шийдсэн байна.

Зам тээврийн сайд Б.Дэлгэрсайхан өмнө нь “Ачаа бараг тээдэггүй хэрнээ “Тавантолгой төмөр зам” ХХК 800 хүнтэй, “Монголын төмөр зам” ТӨХК 600 гаруй хүнтэй байна.  Хэрэв хувийн компани байсан бол ийм олон хүн оффист суулгаад тэжээгээд байна гэж байхгүй шүү дээ” гэж мэдэгдэж байсан удаатай. Иймээс халаа сэлгээ зөвхөн “Монголын төмөр зам ТӨХК-иар дуусгавар болчихгүй “Тавантолгой төмөр зам” ХХК-ийн хаалгыг ч тогших чимээ дуулдаж буй.

“Тавантолгой төмөр зам” ХХК-ийн хяналтын менежер Э.Тамир өнгөрсөн сард мэдээлэл хийх үеэрээ ““Энэ компанид олон асуудал байна. Муурны хоол, муурны цээживч, чипс, шартуулдаггүй ундаа зэрэг олон юм худалдан авсан байдаг. Ганц баримт үзэхэд л ийм зүйл илэрсэн.

Би энэ компанид өнгөрсөн нэгдүгээр сард томилогдож очсон. Одоог болтол материалуудаа гаргаж өгдөггүй.  Маш олон хүний ажил үүрэг давхардсан байдаг. Худалдан авах ажиллагаа нь хоёр газар байдаг. Захиргаан дээрээ, санхүү дээрээ байдаг. Хүмүүс бараа нийлүүлдэг ч мөнгийг нь өгдөггүй гэхчлэн маш олон асуудал байна” гэж мэдэгдсэн юм.

Г.ХОРОЛ