ОХУ-ын ерөнхийлөгч Путин Ялалтын баяраар гурав хоног гал зогсоох шийдвэр гаргасан. Энэ шийдвэрийг Зеленский жүжиг гэж нэрлээд, "Путиныг тусгаарлагдмал байдлаас гаргах таатай уур амьсгал бүрдүүлэх тоглоомд Украин оролцохгүй" гэжээ.

Харин Кремль энэ төлөвлөгөөгөө "Украиныг урт хугацааны энх тайванд бэлэн эсэхийг шалгаж буй үйлдэл" гэж нэрлэсэн юм. Цаашилбал, баярын өдрийг шууд утгаар заналхийлсэн гэж Зеленскийг буруутгажээ.

Ялалтын баярт Хятадын дарга Ши Жиньпин тэргүүтэй гадаадын 20 орчим удирдагч оролцох төлөвтэй байна. Зарим улсын төлөөлөгчид Орост айлчилж байгаагаа мэдэгдээд, энэ үеэр аюулгүй байдлыг хангаж өгөхийг Украинаас хүсчээ. Зеленский энэ хүсэлтийн хариуд "Тавдугаар сарын 9-нд Оросыг зорих улс орнуудад чиглэсэн бидний байр суурь их энгийн. Оросын газар нутагт болж буй үйл явдалд бид хариуцлага хүлээхгүй гэсэн байр суурь л баримтална. Тэд өөрсдөө л таны аюулгүй байдлыг хангана. ОХУ магадгүй энд тэнд галдан шатаах, тэсэлж дэлбэлэх гэх мэт янз бүрийн арга хэмжээ авчихаад, түүндээ биднийг буруутгах байх" гэлээ.

Зеленский тухайн өдөр чухам юу хийхээ хэлээгүй ч гэлээ түүний хэлсэн үгийг шууд заналхийлэл гэж Кремль үзэж байна.

Энэ талаар Оросын Гадаад хэргийн яамны хэвлэлийн төлөөлөгч Мариа Захарова хэлэхдээ "Зеленский парадад хүрэлцэн ирэх ахмад дайчдын бие махбодийн аюулгүй байдалд заналхийлж байна. Түүний мэдэгдлийг мэдээж шууд заналхийлэл гэж хэлнэ" гэв.