Сагсан бөмбөгийн Азийн аваргуудын лигийн тоглолтууд үргэлжилж байна. Монголын дээд лигийн аварга Хасын Хүлэгүүд баг Тайландын Бангкок хотноо Сингапурын аварга Адройт болон Тайландын аварга Хай-Тек багуудыг буулган авав.

ХҮЛЭГҮҮД 87 – 41 АДРОЙТ

Эхлээд орос легионеруудаар хүчээ зузаатгасан Сингапурын аваргуудтай тоглож, 87-41 гэсэн харьцаатай илт давуу ялалт байгуулжээ. Тоглолтын эхлэлийг Хүлэгүүдээс Б.Барсболд сайн тавьж, довтолгоонд санаачлагатай оролцов. Хоёрдугаар үед хоёр баг харилцан оноо авсан ч Хүлэгүүдэд довтолгооны сонголт олон байлаа. Гуравдугаар үед л гэхэд онооны зөрүү 30 болж, ялагч тодорхой болжээ.

Тоглолтын дараа Хүлэгүүдийн дасгалжуулагч Э.Ариунболд "Энэ бол бидний бэлтгэлийн үр дүн. Сүүлийн хоёр өдөр миний хувьд бид сайн бэлдсэн гэж бодож байна. Тиймээс л өнөөдөр хожиж чадлаа" гэв.

Хүлэгүүдийн шинэ цэрэг Жорди Чиманга 18 оноо, 11 самбар авч, хоёр аравт гүйцэтгэжээ. Тэрбээр "Бид энд ирээд ажлаа бүрэн дүүрэн гүйцэтгэлээ. Залуусаараа бахархаж байна. Энэ эрчээ алдахгүй ээ" гэжээ.

ХҮЛЭГҮҮД 63 – 59 ХАЙ-ТЕК

Хүлэгүүдийн хэсгийн шатны аялан тоглолтын сүүлийн өрсөлдөгч нь Хай-Тек байлаа. Тоглолтын эхнээс хоёр баг эн тэнцүү өрсөлдөөнийг үзүүлж, хоёр болон гуравдугаар үед Хүлэгүүд илүүрхэж, онооны тэргүүллийг авсан. Гэвч дөрөвдүгээр үед Хай-Тек онооны зөрүүг багасгаж, тоглолт нь сэргэсэн. Энэ үед Ян Миллер өрсөлдөгч багийнхаа эрийг дарсан алсын зайн шидэлтийг амжилттай болгож, багтаа ялалт авчрав.

Хоёр багийн довтолгооны гүйцэтгэл тун тааруу байсан гэдгийг онцлох хэрэгтэй.

Тоглолтын шилдэг болсон Б.Барсболд "Бидний хамгаалалт сайн ажиллаа. Хамгаалалтаараа л хожил авлаа. Одоо бид гэртээ гурван тоглолт хийнэ. Мэдээж өнөөдрийн тоглолт тун амаргүй байлаа. Бид хамгаалалт, довтолгоон дээрээ улам хичээх хэрэгтэй байна" гэжээ.

Ийнхүү Хасын Хүлэгүүд баг аялан тоглолтоосоо гурван хожилтой эргэн ирлээ. Тэд ирэх өдрүүдэд Улаанбаатар хотноо гурван тоглолт хийнэ. Тэд хэсгээ нэг ч хожигдолгүй тэргүүлж байна.