"Berkshire Hathaway"-ийн хувьцаа эзэмшигчдийн жил тутам зохион байгуулагддаг ээлжит хурал Бямба гаригт /2025.05.03/ боллоо. Энэ үеэр гүйцэтгэх захирал Уоррен Баффет залуу хөрөнгө оруулагчдад зориулж үнэтэй сургамж, зөвлөгөөгөө хуваалцав. Тэрбээр хувьцаа сонгох, хамгийн сайн урт хугацааны хөрөнгө оруулалт хийх зэрэг мэргэжлийн зөвлөгөөнөөс илүүтэй хөрөнгө оруулагч хүн гэж ямар хүн байх ёстой талаар амьдралтай зөвлөгөөнүүд өгсөн юм.

Түүний хэлсэн үгсээс онцолбол: 

"Таны хэнтэй харилцах нь маш чухал. Бүх шийдвэрийг зөв гаргана гэж өөртөө найдах хэрэггүй. Хамтран ажилладаг, хайрлаж хүндэлдэг, найзлаж нөхөрлөсөн хүмүүсийнхээ ерөнхий чиг хандлагаар таны амьдрал урагшлах болно. Таныг өөрөөсөө илүү байгаасай гэж хүсдэг хүмүүс байдаг. Та ч бас өөрөө илүү хүмүүстэй хамт байхыг хүсдэг байх. Энэ нь зүгээр л их мөнгө олдог хүнийг дагаж, тэдний хийж байгаа зүйлийг хуулбарлахаас тэс өөр. Хажуунаас нь суралцаж болох ухаалаг хүмүүсийн дэргэд байхыг хичээх нь илүү дээр.

Мөн та нар мөнгөнөөс үл хамааран хийх тийм л дуртай ажлаа сонго. Буруу юм хэлж байгаагаа мэдэж байгаа атлаа хий гэж хэлдэг хүмүүстэй хамтрах хэрэггүй. Хөрөнгө оруулалтын ертөнц дэх олон олон хүн маш их мөнгө олсоныхоо дараа бизнесээ орхидог нь надад сонирхолтой санагддаг" гэж тэр хэлжээ.

Мөн "Berkshire Hathaway"-д ажилд орохын тулд юу хийх ёстой вэ гэж залуу хөрөнгө оруулагч түүнээс асуухад "Сониуч бай, их унш" гэж хариулсан байна.

Дашрамд дурдахад, Уоррен Баффет Монголын хөрөнгө оруулагчдад хандан зөвлөгөө өгчээ. Тэрбээр "Тогтвортой мөнгөн тэмдэгттэй болъё гэвэл бусдын итгэл хүндлэлийн төлөө тууштай ажилла. Боломж байгаа гэж бодсон улс бүхэн рүү явахыг бид хүсэхгүй. Инфляци огцом өсөх магадлалтай улс гэсэн үг. Үүнийг тооцоолоход хэцүү. Хэт инфляцийн нөхцөлд мөнгө олох арга замыг олж мэдсэн хүмүүс бий. Гэхдээ энэ бол бидний тоглох тоглоом биш. Ийм тоглоомоор сайн тоглоно гэж би бодохгүй байна. Энэ бол чухал хүчин зүйл. Хэрвээ тухайн улс бизнест ээлтэй, валютын асуудлыг сайн мэддэг байвал энэ нь иргэддээ сайнаар нөлөөлнө, ялангуяа байгалийн баялагтай бол" гэжээ.

Хөрөнгө оруулалтын салбарын аварга загас Уоррен Баффет өдгөө 94 настай. Тэрбээр энэ оны эцэс гэхэд албан тушаалаа хүлээлгэж өгөх бодолтой байгаагаа гэнэт хэлж, танхим дүүрэн олныг цочирдуулсан юм. Түүний залгамж халааг Грег Абел авах аж.