АНУ-ын ерөнхийлөгч Дональд Трамп өнгөрсөн долоо хоногт Ромын пап Францисын оршуулах ёслолд оролцож ирсэнийхээ дараа "Би пап болмоор байна. Энэ л миний нэн тэргүүний сонголт байх болно" гэж хошигносон. Түүний энэ хошигнол даамжирч, папын хувцас өмссөн байдлаар эвлүүлсэн AI зургаа Баасан гаригт /2025.05.02/ цахим хуудсандаа байршуулжээ.

Ингээд зогссонгүй Цагаан ордон хүртэл энэ зургийг нь цахим хуудсандаа нийтэлснээр олон нийтийн шүүмжлэлийн бай болоод байна. Зарим хүн үүнийг хөнгөн хошигнол маягаар хүлээж авсан ч олон хүн хүчтэй шүүмжилж байна.

Тухайлбал, Нью-Йоркийн Католик чуулган албан ёсны цахим хуудсандаа "Энэ зурганд ямар ч ухаалаг, хөгжилтэй зүйл алга. Бид хайрлаж хүндэлдэг пап Францисаа оршуулаад удаагүй байна. Кардиналууд Гэгээн Петрийн шинэ залгамжлагчийг сонгох гэж байна. Биднийг ингэж бүү элэглээч" гэжээ.

Харин Бүгд найрамдах намын Үндэсний хорооны дарга асан Майкл Стил "Энэ зураг нь Трамп ямар буурь суурьгүй, чадваргүй гэдгийг харуулж байна" гэв. Тэрбээр Трампийг шүүмжилдэг гэдгээрээ алдартай нэгэн.

Мөн л Трампийг шүүмжлэгч гэгддэг консерватив тоймч Билл Кристол "Ж.Д.Вэнсээс асууя. Гэгээн эцгийг чинь ингэж үл хүндэлж, шоолох зүгээр үү?" гэжээ. Ж.Д.Вэнсийн хувьд 2019 онд католик шашинтан болсон бөгөөд Билл Кристолын асуултын хариуд "Хошигнож буй хүмүүс надад төвөг болохгүй. Харин мянга мянга эх орон нэгтнээ хөнөөх тэнэг дайныг эхлүүлдэг хүмүүс л жаахан тиймхэн санагддаг" гэжээ. Энэ үгээрээ тэр Билл Кристолын АНУ-аас Ирак руу довтлохыг дэмждэг байсныг дайруулсан байна.