ОХУ-ын арми Украины цэргүүдийг Курск мужаас хөөн гаргасныхаа дараа Сумы муж дахь хилийн бүсэд хамгаалалтын зурвас байгуулахаар оролдож байна. Путин гуравдугаар сард мэдэгдэл хийхдээ "ОХУ хил дамнасан халдлагаас хамгаалахын тулд Украины зүүн хойд бүс нутагт буфер бүс бий болгох ёстой" гэж байв. Тэгвэл ОХУ-ын Батлан хамгаалах яам Баасан гаригт "Украины анги нэгтгэлүүдийг Курск мужид байлдан дагуулж дууслаа. Одоо Сумы мужийн хилийн бүсэд хамгаалалтын зурвас байгуулах ажил үргэлжилж байна" гэж мэдэгджээ.

Украин хэдэн сарын өмнөөс ОХУ Сумы муж руу довтлохоор төлөвлөж байгааг мэдэгдсэн.

Шинжээчдийн үзэж байгаагаар Сумы мужийн 135 км кв хүртэлх талбай нь маргаантай саарал бүсэд тооцогдож байна. Өөрөөр хэлбэл, энэ бүсэд аль ч тал бүрэн хяналт тавьдаггүй.

ОХУ-ын Агаарын десантын довтолгооны бригадын командлагч хэлэхдээ, "Сумыд тулалдаж буй Украины цэргүүдийн сэтгэл санаа унасан байна. Бид тэдний удирдлагын системийг эмх замбараагүй болгосон" гэжээ. Харин Сумы мужийн амбан захирагч Олех Хрихоров өнгөрсөн Мягмар гаригт Оросын дайралтаас болж бүс нутгийн дөрвөн хилийн тосгон саарал бүсэд орсныг хүлээн зөвшөөрсөн байна.