Европ Монголын хамтарсан худалдаа аж үйлдвэрийн танхим /ЕвроЧамбер/-ын бүх гишүүдийн чуулга уулзалт өнөөдөр /2025.05.02/ болж байна. Тус танхим нь 2019 онд хоёр бүс нутгийн хооронд худалдаа, хөрөнгө оруулалтыг нэмэгдүүлэх, эдийн засгийн тогтвортой, хүртээмжтэй түншлэлийг бий болгох зорилгоор байгуулагдсан бөгөөд өнөөдөр 71 гаруй гишүүн байгууллагатайгаар үйл ажиллагаагаа өргөжүүлсээр байгаа юм.

ЕвроЧамберын өнөөдрийн арга хэмжээ нь Европ болон Монголын бизнесийн байгууллагуудын хамтын ажиллагааг шинэ шатанд гаргах, тогтвортой хөрөнгө оруулалтын орчныг бэхжүүлэх, цаашдын байгууллагын бодлого, стратегийг тодорхойлоход чухал алхам болно гэдгийг оролцогчид онцоллоо.

Бүх гишүүдийн чуулга уулзалтын үеэр дараах гол асуудлуудыг хэлэлцэж байгаа юм. Үүнд:

• 2024 оны үйл ажиллагааны тайлангийн танилцуулга,
• 2025 оны үйл ажиллагааны төлөвлөгөөний ерөнхий танилцуулга,
• Байгууллагын таван жилийн бодлого болон стратеги, түүнтэй холбоотой бодлогын тэргүүлэх чиглэлүүдийг тодорхойлох,
• Европ, Монголын бизнесийн орчныг цаашид өргөжүүлэн бэхжүүлэх тухай санал солилцох зэрэг хэлэлцүүлэг өрнөж байна.

Түүнчлэн энэхүү арга хэмжээгээр ЕвроЧамбер төлөөлөн удирдах зөвлөлийн /ТУЗ/ сонгуулийг зохион байгуулах бөгөөд үүний үр дүнд нь шинэ бүрэлдэхүүн, хамт олон бий болж байгаа нь онцлог аж.

Энэхүү чуулга уулзалтын нээлтэд хүндэт зочин болох Европын Холбооноос Монгол Улсад суугаа Элчин Сайдын яамны хөтөлбөр хариуцсан менежер ноён Арно Априю оролцож, нээлтийн үг хэлсэн байна. Тэрбээр Европ, Монголын эдийн засгийн харилцаа бэхжин хөгжиж байгаад баяртай байгаагаа илэрхийлээд үүнд ЕвроЧамберийн зүгээс үзүүлж буй хувь нэмрийг магтан сайшаажээ.