ТҮЦ эрхлэгчид өнөөдрөөс /2025.05.01/ Хүний эрхийн үндэсний комиссын гадаа өлсгөлөн зарлаж эхлээд байна. Улаанбаатар хотын хэмжээнд өнгөрсөн дөрөвдүгээр сарын 9-нөөс эхлэн нийтийн эзэмшлийн зам талбайд байршуулсан ТҮЦ –үүдийг нүүлгэж, журмын хашаанд хүргэсэн юм. ТҮЦ эрхлэгчид нийслэлээс хэрэгжүүлсэн дээрх арга хэмжээг эсэргүүцэн, хүний эрхийг ноцтой зөрчиж байна гэж үзэн, Хүний эрхийн үндэсний комисст өнгөрсөн дөрөвдүгээр сарын 25-нд ханджээ. Гэвч өнөөдрийг хүртэл тус комисс хариу өгөөгүй юм байна. Тиймээс хариугаа авах шаардлага тавин өлсгөлөн зарлажээ.

ТҮЦ эрхлэгчдийн зүгээс “Өдрөөс өдөрт өр зээл нэхэгдэж байна.  Гэтэл ТҮЦ-ийг маань ачаад явахдаа барааг цуг авч явсан. Барааны маань хугацаа дуусч, хадгалалтын горим алдагдсанаас муудсан. ТҮЦ-ээ хашаандаа аваачаад тавьчихая гэхэд зөвшөөрөөгүй, маш их хохирлоо.  Үлдсэн ТҮЦ-үүдээ үлдээх зорилгоор өнгөрсөн өдрүүдэд шөнийн турш ажилласан ч дийлсэнгүй. Төр төмөр нүүртэй юм байна” гэж ярьж байна.

Улаанбаатар хотын захирагчаар ажиллаж байсан Д.Сумъяабазар нийслэлээс олгодог зарим зөвшөөрлийг цуцлах шийдвэр гаргаснаар ТҮЦ эрхлэхэд нийслэлээс зөвшөөрөл авах шаардлагагүй болсон аж. Гэвч одоо ТҮЦ-үүдийг зөвшөөрөлгүй үйл ажиллагаа эрхэлж байна гэж үзэн, нийтийн эзэмшлийн зам талбайгаас чөлөөлж буй.

Нийтийн эзэмшлийн газарт байршуулсан ТҮЦ-ийг нүүлгэн шилжүүлэхдээ хүний эрх зөрчсөн гэх дөрвөн удаагийн гомдол нэр бүхий иргэдээс ХЭҮК-т ирсэн байна. Тиймээс ХЭҮК-ын гишүүн Б.Энхболд, Нийслэлийн Засаг даргын Тамгын газрын дарга Д.Амгалан, Улаанбаатар хотын Захирагчийн ажлын албаны Хүнс, худалдаа үйлчилгээний газрын дарга Ж.Дуламсүрэн болон дүүргийн Засаг дарга нартай өнөөдөр уулзжээ. Нийслэл, дүүргийн удирдлагуудын зүгээс одоогоор төвийн зургаан дүүргийн хэмжээнд 1278 ТҮЦ-ийг нүүлгэж, 467 үлдсэн. ТҮЦ эрхлэгч иргэдэд сул байгаа 1698 ажлын байрнаас санал болгох, худалдааны төвүүдэд лангуу түрээслэж өгөх болон бусад саналуудыг тавьсан. Холбогдох хууль, журмын дагуу үйл ажиллагаа явуулж байгаа гэдэг мэдээллийг Комисст өгсөн байна.

Харин ХЭҮК-ын зүгээс ТҮЦ эрхлэгч иргэн бүртэй дахин уулзалт зохион байгуулж, худалдаа үйлчилгээ эрхлэх боломж, санал болгож буй ажлын байр, түрээсийн үйлчилгээний талаар тодорхой тайлбарлаж үр дүнтэй зөвшилцөх. Бусдын эд хөрөнгийг гэмтээж хохирол учруулахгүй байх, хүний эрхийг хүндэтгэсэн үйл ажиллагаа явуулахыг зөвлөжээ.

Г.ХОРОЛ