Хятад улс худалдааны асуудлаар АНУ-тай ярилцахад бэлэн байгаа гэдгээ илэрхийлэв. Гэхдээ юун түрүүнд Хятадын импортын бараа бүтээгдэхүүнд ногдуулсан 145 хувийн тарифыг эргүүлэн татах хэрэгтэй гэх шаардлагыг АНУ-д тавьж байна. Хятадын Худалдааны яам АНУ тарифаа цуцалж, яриа хэлэлцээнд бодитоор хандана гэдгээ илэрхийлэхгүй бол цаашид Вашингтонд тавьсан хоригийг мөн адил цуцлах, багасгах ямар ч боломжгүй гэж Баасан гаригт (2025.05.02) мэдэгдэв. Өмнө нь АНУ-ын зүгээс Пүрэв гаригт Бээжингийн албаны хүмүүстэй холбоо тогтоох гэж оролдсон ч тодорхой үр дүнд хүрээгүй байсан. Улмаар Хятадын тал өнөөдөр албан ёсоор мэдэгдэл гаргасан аж.

АНУ-ын ерөнхийлөгч Дональд Трамп энэ оны эхээр олон улсын бараа бүтээгдэхүүний импортод нэмэлт тариф ногдуулсан нь тус улсын эдийн засгийн өсөлт удаашрахад хүчтэй нөлөөлөв. Мөн Хятадын үйлдвэрлэлтийн хэмжээг багасгахад нөлөөлж, хоёр орны эдийн засагт үр дүнгээ үзүүлж эхэлсэн.

Гэсэн хэдий ч Бээжин зөвхөн АНУ-д импорт илгээдэггүй тул харьцангуй хохирол бага амсана гэж мэргэжилтнүүд үзэж байна.

Хятад улс мөн шаардлагатай бол эцсээ хүртэл тэмцэнэ гэж амлаж буй. Гэсэн хэдий ч Цагаан ордон түрүүлж буулт хийх магадлал бага байгаа тул мэргэжилтнүүд хоёр орны эрх баригчид түргэн хугацаанд шийдвэрт хүрнэ гэдэгт эргэлзсээр байна. Хэрэв зөрчилдөөн үргэлжилсээр байвал бусад улс орны бизнес, зах зээлийг удаан хугацаагаар тасалдахад хүргэнэ гэж эмээж буй.