АНУ-ын төлөөлөгчид Пүрэв гаригт (2025.05.01) зах зээл болон дэлхийн нийлүүлэлтийн сүлжээнд хүндрэл учруулсан татварын тарифын талаар хэлэлцэхээр Хятадын албан тушаалтнуудтай холбогджээ. Одоогийн байдлаар, АНУ-ын зүгээс Хятадын импортод 145 хувийн нэмэгдэл тариф ногдуулсан бол Бээжин хариуд нь 125 хувийн татвар ногдуулж буй. Хятадын төв телевиз "CCTV"-гийн харьяа Юйюань Таньтянь агентлаг Пүрэв гаригт мэдээлснээр, Вашингтон олон арга зам, сувгаар Хятадтай тарифын асуудлаар хэлэлцэх гэж идэвхтэй холбогдож байгаа аж.

Мөн "Хэлэлцээ хийх талаас харахад АНУ сандарч эхэлсэн. Трампийн засаг захиргаа олон талын дарамтад орсон байна" гэж тус агентлаг онцлон тэмдэглэв.

"AFP" агентлаг Вашингтоны төлөөлөгчид Бээжинтэй холбогдох гэж оролдож байгаа гэх мэдээллийн тодруулахаар Хятадын Гадаад хэргийн яамд ханджээ. Үүний хариуд яамны зүгээс "АНУ-ын ерөнхийлөгч Дональд Трамп Хятадын тарифын талаар хэлэлцээ хийхээр удаа дараа хандсан" гэх тайлбарыг өгсөн байна. Мөн Трамп Мягмар гаригт цахим хуудаснаа "Хятадтай хэлэлцээр хийх маш өндөр магадлалтай. Гэхдээ бид гэрээг өөрсдийн нөхцөлөөр хийх болно, мөн энэ нь шударга байх ёстой" гэж мэдэгдсэн байна. Харин Бээжин ямар нэгэн хэлэлцээр явагдаж байгаа гэдгийг эрс няцааж, АНУ-ыг шударга, хүндэтгэлтэй, харилцан ашигтай хэлбэрээр яриа хэлэлцээ хийхийг удаа дараа уриалсан юм. Гэсэн ч Хятадын Гадаад хэргийн яам энэ долоо хоногт олон нийтийн цахим хуудаснаа "Хэзээ ч сөхрөхгүй!" гэх видео бичлэгийг цацаж, хэрвээ шаардлагатай бол худалдааны дайнд эцсээ хүртэл тэмцэх болно гэж мэдэгджээ.