Техас мужийн Ансон гэх жижиг хотод байрладаг Блюбоннет цагаачдыг саатуулах төвийн хоригдлууд дэлхий дахинаас аврал хүсч, мессеж илгээлээ. Тодруулбал, нийт 31 хоригдол Даваа гаригт "SOS" гэсэн үсгийг бүтээн зогссоныг "Reuters" агентлаг нисгэгчгүй нисэх онгоцоор баталгаажуулжээ.

Тус төвд хоригдож байсан олон арван венесуэль хоригдол 10 хоногийн өмнө цагаачлалын албаныхнаас мэдэгдэл хүлээж авчээ. Хоригдлуудыг Венесуэлийн Трен де Арагуа гэх гэмт бүлэглэлийн гишүүд учир дайны цагийн тусгай хуулийн дагуу албадан гаргаж магадгүй гэж мэдэгдэлд дурдсан байв. Энэ мэдээллийн дагуу зарим хоригдлын гэр бүлийн гишүүд хэвлэлд хандсан байна. Тухайн хоригдлууд гэмт бүлэглэлийн гишүүд биш учир гэрээнд гарын үсэг зурахгүй гэж гэр бүлийнхэн нь мэдэгдэж байна.

"Reuters" агентлагийн авсан гэрэл зурагнаас харахад зарим хоригдолд өндөр эрсдэлтэй гэж тодорхойлсон улаан комбинзон өмсгөсөн байжээ.

Өнгөрсөн хэдэн жилийн хугацаанд хэдэн мянган венесуэль хүн эдийн засгийн уналт, ерөнхийлөгч Николас Мадурогийн хэлмэгдүүлэлтээс зугтан АНУ-д ирсэн. Жо Байдены үед тэдний олонх нь хүмүүнлэгийн түр хамгаалалт авч чадсан. Өдгөө Трампийн засаг захиргаа үүнийг цуцлахыг оролдож байна.

АНУ-ын төрийн нарийн бичгийн дарга Марко Рубио энэ оны эхээр Эль Сальвадорт айлчилсан. Тухайн үед Эль Сальвадорын ерөнхийлөгч Наиб Букеле дэлхийн хаана ч байхгүй хамгийн ер бусын цагаачлалын гэрээг зөвшөөрсөн юм. Тодруулбал, АНУ-аас албадан гаргасан аль ч үндэстнийг Эль Сальвадор улс хүлээж авахад бэлэн гэжээ.

Эль Сальвадорын хорих анги нь ялтнуудтай харгис хэрцгий харьцдаг гэдгээрээ алдартай бөгөөд хүний эрхийн байгууллагуудын шүүмжлэлд өртдөг.