АНУ, Украин улсууд олон сар үргэлжилсэн хэлэлцээний эцэст эрчим хүч, ашигт малтмалын нөөцийг хамтран ашиглах гэрээнд гарын үсэг зурлаа. Мөн дайны дараа эдийн засгийг сэргээхэд түлхэц үзүүлэхийн тулд сэргээн босголтын хөрөнгө оруулалтын сан байгуулахаар тохиров. Гэрээнд АНУ-ын Сангийн сайд Скотт Бессент, Украины Тэргүүн шадар сайд Юлия Свириденко нар гарын үсэг зуржээ. Талууд өнгөрсөн долоо хоногт гэрээний санамж бичигт гарын үсэг зурсан билээ.

Түншлэл нь 50:50 тэнцүү харьцаатай байх аж.

"Энэ үйл явдал нь талууд Украин дахь тогтвортой энх тайван, хөгжил цэцэглэлтийн төлөө санаа нэг байгааг харуулна" гэж Скотт Бессент хэлэв.

Харин Украины хувьд энэ хэлэлцээр нь АНУ-аас цэргийн тусламж авахад зайлшгүй шаардлагатай хүчин зүйл болоод буй. Хэлэлцээрийн дагуу АНУ-аас Украинд шинэ тусламж удахгүй үзүүлж эхэлнэ. Тухайлбал, агаарын довтолгооноос хамгаалах системийг нийлүүлнэ гэдгийг Бессент дурдлаа.

Украин нь бал чулуу, титан, лити зэрэг чухал ашигт малтмалын асар их нөөцтэй улс. Эдгээр ашигт малтмалыг сэргээгдэх эрчим хүч, цэргийн хэрэглээ, үйлдвэрлэлийн дэд бүтцэд ашигладаг тул эрэлт хэрэгцээ ихтэй байдаг.

Дэлхийн ховор элементийн нөөцийн 90 хувийг Хятад нийлүүлдэг. Гэтэл Хятад, АНУ хоёр худалдааны дайнтай байгаа цаг үед энэхүү чухал гэрээг байгуулж байна. Хоёрдугаар сард гэрээнд гарын үсэг зурах ёстой байсан ч Трамп, Зеленский нарын Цагаан ордон дахь бүтэлгүй хэлэлцээний дараа энэ нь нуран унасан юм. Гэхдээ Ромын пап Францисын оршуулах ёслолд оролцсоны дараа тэд дахин уулзаж ярилцсанаар яриа хэлэлцээнд ахиц гарсан гэж үзэж байна.