ОХУ-ын ерөнхийлөгч Путин, Беларусийн удирдагч Александр Лукашенко нар дэлхийн хоёрдугаар дайны ойн арга хэмжээний хүрээнд Мягмар гаригт Волгоградад хүрэлцэн иржээ. Айлчлалын эхэнд удирдагчид Сталинградын дурсгалын цогцолборт цэцэг өргөсөн ба дараа нь Орос-Беларусийн парламентын “Их өв – хамтын ирээдүй” форумд үг хэлэв.

Лукашенко энэ үеэр "Брестээс Владивосток хүртэл нэг эх орон гэдэгт бид санал нэг байна. Хоёр өөр улс бий болсон байгаа ч гэлээ бид харилцаагаа нэгдмэл улсаас ч илүү ойр байлгахын тулд бүхнийг хийх ёстой" гэжээ.

Орос, Беларусь улсууд 1999 онд "Холбооны улс байгуулах гэрээ"-г байгуулсан. Энэхүү гэрээ нь хоёр улсын хооронд улс төр, эдийн засаг, батлан хамгаалах, гадаад бодлого зэрэг олон салбарт гүнзгий интеграци хийх зорилготой байсан. Мөн 2022 онд ОХУ Украинд довтлохдоо Беларусийн газар нутгийг ашигласан билээ. Үүнээс хойш хоёр улс цэргийн хамтын ажиллагаагаа өргөжүүлсээр байна. Тухайлбал, өнгөрсөн оны арванхоёрдугаар сард талууд харилцан батлан хамгаалах гэрээнд гарын үсэг зурсан. Ингэснээрээ Беларусь улс цөмийн зэвсэгтэй Оростой эвсэж буйгаа албан ёсоор баталгаажуулсан юм.

Форумын дараа удирдагчид хоёр улсын стратегийн түншлэлийн талаар хэлэлцэв. Энэ үеэр тэд нисэх онгоцны хамтарсан үйлдвэр байгуулахаар боллоо.

Дашрамд дурдахад, Волгоград нь 1925-1961 онд Сталинград нэртэй байв. Энэ нь 1943 онд нацист цэргүүдийг ялснаар Зөвлөлтийн цэргүүдийн ашиг сонирхолд шилжсэн тулааны цэг юм. Хотын нэрийг жилдээ зургаан өдөр бэлгэдлийн чанартайгаар Сталинград гэж өөрчилж байх саналыг 2013 онд хууль тогтоогчид гаргасан. Энэ жилийн тухайд тавдугаар сарын 8-10-ны хооронд Волгоград дахь нисэх онгоцны буудлын нэрийг Сталинград Олон улсын нисэх онгоцны буудал гэж өөрчлөх болжээ.