Хойд Солонгос улс шинэ сөнөөгч хөлөг онгоцоо дөрөвдүгээр сарын 27-нд танилцуулж, нээлтэд нь удирдагч Ким Жон Ун оролцсон билээ. Тэгвэл тус хөлөг онгоцны зэвсгийн системийг анх удаа туршив. Энэ нь 5000 тонн жинтэй Чо Хён шинэ эсминецид суурилуулсан зэвсгийн системүүдийн байлдааны хэрэглээний туршилт юм.

Шинэ сөнөөгч хөлөг онгоц нь дуунаас хурдан стратегийн далавчит пуужин, тактикийн баллистик пуужин болон бусад цохилт өгөх хэрэгслээр тоноглогдсон.

Эхний туршилтыг Даваа гаригт хийхдээ дуунаас хурдан далавчит пуужин, стратегийн далавчит пуужин, зенитийн пуужин, 127 миллиметр хөлөг онгоцны автомат бууг тус тус туршжээ. Мягмар гаригт хөлөг онгоцноос хөлөг онгоц руу чиглүүлэх тактикийн удирдлагатай зэвсэг, хөлөг онгоцны автомат буу, утаа ялгаруулагч буу, электрон системийг саатуулагч бууг тус тус туршсан байна.

Ким Жон Уны мэдэгдсэнээр, Чо Хён ангиллын устгагч хөлөг онгоц нь дайралтаас урьдчилан сэргийлэх хүчтэй төдийгүй халдлага хийх чадвар нь ямар ч цар хүрээгээр хэмжигдэхгүй аж.