ОХУ-ын ерөнхийлөгч Путин ирэх сард болох Ялалтын баяраар гурван өдөр гал зогсоох тухай Даваа гаригт /2025.04.28/ зарлалаа. Тодруулбал, тавдугаар сарын 8-11-ний хооронд Украин дахь бүх цэргийн ажиллагааг зогсооно. ОХУ тавдугаар сарын 9-ний өдөр Нацист Германыг ялсны 80 жилийн ойг тэмдэглэх билээ.

Түүний энэ шийдвэрийг Украины ерөнхийлөгч Зеленский "төөрөгдүүлэх оролдлого" гэж нэрлэжээ. Тэрбээр "Кремлийн удирдагч энх тайвныг хүсч байна гэж байгаа ч АНУ-ын санал болгосон 30 өдрийн хэлэлцээрийг хүлээж аваагүй. Киев харин үүнийг хүлээн зөвшөөрсөн. ОХУ байнга бүхнийг үгүйсгэж, АНУ-ыг хууран мэхлэхийг оролдож, дэлхийг төөрөгдүүлсээр байна. Энэ удаад бас л төөрөгдүүлэх оролдлогоо давтлаа. Путины жагсаалыг нам жим явуулахын тулд зарим хүн тавдугаар сарын 8 хүртэл хүлээх ёстой бололтой" гэсэн юм.

Харин Зеленскийн ажлын албаны дарга Андрей Ермак "Байнгын, нөхцөл болзолгүй, иж бүрэн гал зогсоох хэлэлцээр л хэрэгтэй. Путины санал болгож байгаа түр зуурын хэлэлцээр лав биш" гэжээ.

Украины Гадаад хэргийн сайд Андрей Сыбиха мөн л Путины зарлигт хариу үйлдэл үзүүлж "ОХУ үнэхээр энх тайвныг хүсч байгаа бол даруйхан л гал зогсоох ёстой. Яагаад тавдугаар сарын 8-ныг хүлээнэ гэж? Украин урт хугацааны, бат бэх, бүрэн гал зогсоох хэлэлцээрт бэлэн байна. Сүүлийн 30 хоногжингоо бид байнга энэ саналаа л тавьж байгаа шүү дээ" гэв.

Кремль Улаан өндөгний баяраар 30 цаг гал зогсоохоо зарласан. Гэвч энэ гэрээгээ зөрчиж, фронтын шугамын дагуу 2900 гаруй удаа гал нээжээ. Украин ч бас гэрээг зөрчсөн гэж ОХУ буруутгаж буй.