Улсын наадам дөхөж, заал танхимын барилдаанууд ч шувтарч байна. Бөхчүүдийн ирэх наадмын өнгө, улсын цолонд ойрхон бөхчүүдийн яриа гараад эхлэв. Удаан хугацаанд барилдаагүй байсан Э.Оюунболд арслангийн барилдах эрх ч сэргэж, нутгийн зон олон, дэмжигчдээ баярлуулжээ. Өдгөө 32 настай түүний хувьд өнгөрөгч амралтын өдрүүдэд болсон барилдаануудад дараалан барилдаж, бэлтгэл сургуулилалтаа тааруулж байх шиг.

Тэгвэл дээрх барилдаануудын үеэр нэгэн зүйл бөх сонирхогчдын анхаарлыг татаж, ярианы сэдэв болов. Тодруулбал, улсын наадамд түрүүлж үзээгүй Б.Орхонбаяр арслан, улсын наадмын түрүүтэй Э.Оюунболдын арслангийн дээр эрэмблэгдсэн нь маргааны сэдэв болжээ.

Өнөө цагт ид барилдаж буй арслан цолтой бөхчүүдийн эрэмбийг Ц.Содномдорж тэргүүлж, түүний араас Б.Орхонбаяр, Д.Ганхуяг, Х.Мөнхбаатар, Б.Ганбат, Э.Оюунболд, Ц.Бямба-Отгон, Д.Азжаргал, Р.Пүрэвдагва гэсэн дараалалтай жагсч байна. Өөрөөр хэлбэл, Б.Орхонбаярын өмнө Ц.Содномдорж л зогсох эрэмбэ бий.

Б.Орхонбаярын тухайд 2022 оны Ардын хувьсгалын 100, 101 жилийн ойн баяр наадмаар ес давж, үзүүрлэж, 2024 онд найм давж, мөн үзүүрлэсэн байдаг. Түүнчлэн 2021 онд зургаа давж, харцага цол, 2019, 2020 онуудад тав давж, начин цолоо баталсан. Ерөнхийдөө төрийн наадмын түрүүг хоёр удаа булаалдаж, дутууджээ.

Харин Э.Оюунболдын хувьд 2013 онд аймгийн арслан цолтой улсын наадамд зодоглож, зургаа даван шууд улсын харцага цолонд хүрсэн. Улмаар 2015 онд түрүүлж, улсын арслан цол, 2016 онд долоо даван чимэг нэмсэн түүхтэй. Угтаа 2019 оны наадамд түрүүлж, улсын аварга цолны болзол хангасан ч допингийн шинжилгээнд бүдэрсэн учир амжилтыг нь хүчингүйд тооцсон. Ийнхүү 2025 оны дөрөвдүгээр сар хүртэл удаа дараа допингийн зөрчил гаргасны улмаас барилдаагүй билээ.

Үндэсний их баяр наадмын үндэсний бөхийн барилдааны дүрэм дээр дээрх асуудлыг тодорхой заасан байдаг. Тухайлбал, тус дүрмийн 2.10 дахь заалт дээр "Үндэсний их баяр наадмын тухай хуулийн 9.8-д заасны дагуу Монголын үндэсний бөхийн холбоо бөхийг цол, амжилтаар нь дараахь журмаар эрэмбэлнэ" гэжээ.

2.10.1.ижил цолтой бөхчүүдээс тухайн цолны болзлоо олон биелүүлснийг, энэ нөхцөл ижил байвал доод давааг олон давсныг эхэнд нь эрэмбэлэх бөгөөд энэ журмаар начин цолны даваа хүртэл тооцоход амжилт нь ижил байвал хэн түрүүлж одоогийн цолоо хүртсэн хугацаагаар, энэ нөхцөл мөн ижил байвал доод цолыг хүртсэн хугацааг тус тус харгалзаж;

Дээрх дүрмэнд улсын арслан цолны эрэмбийг тусгайлан заагаагүй учир 2.10.1 гэх заалтын дагуу эрэмблэх аж. Харин аварга цолны эрэмбэ дээр тусгай заалт бий. Дурдвал, "2.10.5.улсын аварга цолтны эрэмбийг улсад хоёр удаа ес даван түрүүлсэн улсын аварга, улсад нэг удаа ес даван түрүүлж, мөн нэг удаа ес даван үзүүрлэсэн улсын аварга, улсад нэг удаа арав даван түрүүлсэн улсын аварга гэсэн дарааллаар" гэжээ.

Улсын наадамд түрүүлж үзээгүй Б.Орхонбаяр арслан, улсын наадмын түрүүтэй арслан цолтнуудын дээр зогсох нь хууль, дүрмийн дагуу гэдгийг та бүхэнд танилцууллаа. Аварга цолтон биш л бол түрүүлсэн, түрүүлээгүй бус хэд давсан бэ гэх давааны тоогоор л бусад цолтны эрэмбийг тогтоож байна.