Тэмцээний шилдгээр тодорсон "ZywOo" буюу Матье Эрбо тоглолтын дараа ярихдаа "Тэд бидэнд амар хожих боломжийг өгсөнгүй. Миний тоглож байсан хамгийн шилдэг Гранд финалын тоглолт байлаа. Ялангуяа "Nuke" дээр эргэн ирнэ гэж бодсонгүй. Өмнө нь яаж ч муу тоглосон эргэн ирнэ гэдэгтээ итгэлтэй байдаг байлаа. Харин энэ удаад үнэхээр дууслаа л гэж бодсон. Үнэхээр гайхалтай тоглолт боллоо. Юу болоод өнгөрсөнийг мэдэхгүй байна. Бүх зүйл маш хурдан болоод өнгөрлөө" гэв.

"CS2"-ийн энэ оны томоохон тэмцээнүүдийн нэг "IEM Мельбурн" тэмцээн өндөрлөлөө. 300 мянган ам.долларын шагналын сантай тэмцээнд дэлхийн шилдэг 16 баг оролцож, өнөөдөр/2025.04.27/ гранд финалын тоглолт болов. Саудын Арабын баян баг, "m0NESY"-г 2.5 сая ам.доллараар Германы "G2" багаас худалдан авсан "Falcons" болон "ropz"-ыг оны эхэнд "FaZe"-с урвуулсанаасаа хойш ялагдал гээчийг бараг үзээгүй, оролцсон тэмцээн бүртээ түрүүлж буй Францын "Vitality" багууд аваргын төлөө өрсөлдлөө.

Хэрэв "Vitality" энэ тэмцээнд түрүүлвэл нэг жилд "ESL"-ийн дөрвөн томоохон тэмцээнүүдэд түрүүлсэн амжилтаараа нэг сая ам.долларын шагнал хүртэх учиртай байв.

"ESL"-ийн зүгээс ч нэг сая ам.доллартаа харам хандаж, "Vitality"-г гранд финалд хожиж, тэмцээнээс хассан багт 100 мянган ам.долларын бонус өгөхөө зарласан.

Нийт таван мап гарсан тоглолтын эцэст шийдвэрлэх "Nuke" мап дээр "Vitality" баг ялж, аварга боллоо. Үгээр илэрхийлж, үзгээр бичимгүй гранд финалын тоглолтод гурван нэмэлт цаг сунгасны эцэст "Vitality" хожив. "Falcons" бараг л хожчихлоо гэж олон хүн бодсон ч "Vitality" итгэмээргүй байдлаас эргэн ирж, яллаа. Үнэхээр өнөө цагийн дэлхийн шилдэг гэдгээ харуулж байна. Тэднийг зогсоох баг энэ дэлхийд, энэ цаг хугацаанд одоогоор алга. Хожлын цуврал нь 21 болов.

Тэд ийнхүү 125 мянган ам.долларын эзэд болжээ. Хамгийн чухал нь Гранд слам хүртэж, нэг сая ам.долларын бонус авлаа.