Шар тэнгист Өмнөд Солонгос, Хятадын эдийн засгийн онцгой бүсүүд давхцан оршдог. Гэтэл хоёр улсын хоорондын далайн хилийг хараахан тогтоогүй бүсэд Хятад улс барилга байгууламж барьсанд санаа зовж буйгаа БНСУ Пүрэв гаригт илэрхийлжээ. Мөн үүнийгээ Хятадын талд уламжилсан байна.

Өмнөд Солонгосын Гадаад хэргийн яам мэдэгдэл хийхдээ “Хятад улс далайн түр бүсэд барилга байгууламж барихаасаа өмнө Өмнөд Солонгост мэдэгдээгүй. Энэ бүсэд хоёр улсын эдийн засгийн онцгой бүсүүд давхацдаг. Тэнгисийн хууль ёсны эрхийг зөрчиж болохгүй гэж бид үзэж байна. Мөн энэ нь хоёр талын загас агнуурын гэрээг зөрчиж буй үйлдэл” гэв.

Хятадын барьсан байгууламж нь гурван хэсгээс бүрдэх аж. Өмнөд Солонгосын “ KBS” телевизийн мэдээлснээр нэг байгууламж нь 80 метр өргөн, 70 метр өндөр буюу нисдэг тэрэгний буудал болгон ашиглахад хангалттай том. Мөн тус байгууламж руу Өмнөдийн судалгааны хөлөг онгоцуудыг ойртуулахгүй байгаа гэв.

Харин Хятадын тал энэ байгууламжаа загасны аж ахуйн зориулалттай гэж тайлбарлажээ. Тус улсын Гадаад хэргийн яамны хэвлэлийн төлөөлөгч Гуо Жякун “Энэ бүтээн байгуулалт нь Хятадын хууль болон олон улсын хууль тогтоомжид нийцэж байгаа. Мөн энэ нь хоёр талын загас агнуурын гэрээг зөрчөөгүй байгууламж. Далайн хилтэй ямар ч холбоогүй байгууламж” гэжээ.

Хоёр улсын засгийн газар уг асуудлыг хэлэлцэх дэд хороог байгуулна гэдгээ мэдэгдээд байна.