Монголын улстөрчид рийл хийдэг, контент хийдэг, шоудсан улс болж хувирч байгааг УИХ-ын гишүүн Г.Ганбаатар шүүмжиллээ.

УИХ-ын чуулганы өнөөдрийн /2025.04.24/хуралдаанаар Хэвлэл мэдээллийн эрх чөлөөний тухай хуулийн төсөл/хэлэлцэх эсэх/-ийг хэлэлцэх үеэр тэрбээр энэ тухай хөндөв.

УИХ-ын гишүүн Г.Ганбаатар “1998 онд баталсан Хэвлэл мэдээллийн эрх чөлөөний тухай хуульд “төрийн байгууллага өөрийн мэдэлд хэвлэл мэдээллийн хэрэгсэлтэй байхыг хориглоно” гэж заасан ч хэрэгжсэнгүй, өнөөдрийг хүргэлээ.  Төрийн бүх байгууллага, төрийн өмчит болоод орон нутгийн өмчит компани дэргэдээ мэдээллийн хэрэгсэлтэй.  Морь харахаас бусад үед сэтгүүлч дагуулаад явж байна. Засгийн газар, манай улстөрчид бүгдээрээ Reel /рийл/ хийдэг, контент хийдэг, нэг их гоё шоудсан улсууд болсон. Гарч байгаа үр дүн нь өнөөдрийн ард иргэдийн амьдрал ямар болсон байгаа билээ” гэж шүүмжлэв.

Үнэндээ ч утасгүй бол үхлээ юу гэдэг шиг УИХ, Засгийн газрын гишүүдийн дийлэнх нь рийл хийж, нийгмийн сүлжээнд тавихгүй л бол ажил нь уначих гээд байгаа юм шиг “аашлах” хүн олон бий.  Зарим нэг нь бүр ярилцлагын контенттой ч болсон.  УИХ, Засгийн газарт давхар алба хашиж байж хаанаасаа тэр их цаг зав гаргаад ярилцлага бэлтгээд байдаг нь сонин. Үнэндээ бол 24 цагийг уртасгах боломжгүй. Төрийн ажлаа л хийдүүлэх эс бол цаг хугацаанаас нь хумсалж байж л ярилцлагын контент бүтээнэ шүү дээ.  Гэвч түүнийгээ мэддэг ч юм уу, мэдсэн ч нийгмийн сүлжээнд л идэвхтэй байвал бусад ажил яах вэ гэж боддог уу, цагаандаа гарсан.

Ер нь цаашдаа УИХ, Засгийн газрын гишүүд хууль тогтоох, салбарынхаа бодлого зангидах асуудалд анхаарахгүй бол ажил унаж байна шүү.

Г.ХОРОЛ