ОХУ-ын ерөнхийлөгч Владимир Путины ойрын холбоотон бөгөөд Чеченийн удирдагч Рамзан Кадыров 17 настай хүүгээ Бүс нутгийн аюулгүйн зөвлөлийн нарийн бичгийн даргаар томилов. Адам Кадыров 2024 оны арваннэгдүгээр сард 17 нас хүрсэн. Тэрбээр 15 настайгаасаа хойш дөрөв дэх удаагаа чухал албан тушаалд томилогдож буй нь энэ.

Өнөөг хүртэл түүнийг Рамзан Кадыровын ахлах бие хамгаалагч, Чеченийн тусгай хүчний их сургуулийн итгэмжлэгдсэн төлөөлөгч, Дотоод хэргийн яамны хянагчийн албан тушаалд тус тус томилсон.

Рамзан Кадыров 2007 оноос хойш Оросын өмнөд хэсэгт орших уулархаг нутаг Чеченийг удирдаж байна. Оросын эсрэг бослого ойр ойр гардаг, исламын шашинт бүс нутгийн тогтвортой байдлыг баталгаажуулахад хүчин зүтгэсэн түүний чармайлтыг Путин үнэлж энэ албанд тохоон томилсон юм.

Дашрамд дурдахад, Адам Кадыров 2023 оны есдүгээр сард буюу 15-хан настайдаа Коран судар шатаасан хэрэгт буруутгагдаж буй хоригдлыг зодож, өшиглөсөн нь багагүй шуугиан тарьсан билээ. ОХУ-ын хүний ​​эрхийн албаныхан болсон явдалд санаа зовниж буйгаа илэрхийлсэн ч Рамзан Кадыров эсрэг байр суурьтай байсан юм. Адамын бичлэг цахим ертөнцөд тарсны дараа Рамзан Кадыров хүүгээ харин ч магтаж, зөв зүйл хийсэн гэжээ.