ОХУ-ын Буриадын Дуурь, бүжгийн эрдмийн театрын шилдэг уран бүтээлчид Монгол Улсад иржээ. Тэд УДБЭТ-ын тайзнаа "Кармен" дуурь болон гала концертоо толилуулахаар бэлтгэж байна. Монголын УДБЭТ-ын хамт олон 2025 онд ОХУ-ын Буриадын Дуурь, бүжгийн эрдмийн театртай олон үйл ажиллагаанд хамтран ажиллахаар төлөвлөжээ. Тодруулбал, 2025 оны дөрөвдүгээр сарын 3, 4-ний өдрүүдэд УДБЭТ-ын хамт олон Буриадын Дуурь, бүжгийн эрдмийн театрт 110 хүний бүрэлдэхүүнтэй айлчлан очиж, Ж. Верди “Аида” дуурь, “Гала концерт”-оо амжилттай тоглоод ирсэн.

Энэ удаад ОХУ-ын Буриадын Дуурь бүжгийн эрдмийн театрын уран бүтээлчдийн Ж. Бизегийн “Кармен” дуурь дөрөвдүгээр сарын 25-ний өдөр, “Гала тоглолт” дөрөвдүгээр сарын 27-ний өдөр тоглох гэж байна.

Нийт 20 хүний бүрэлдэхүүнтэй Буриадын уран бүтээлчид өчигдөр /2025.04.23/ Монголд иржээ. Тоглолтод ОХУ-ын Гавьяат жүжигчин Билигма Ринчинова, Буриад улсын Ардын жүжигчин Н.Мөнхзул, Буриад улсын Ардын жүжигчин Эдуард Жагбаев, Буриад улсын Ардын жүжигчин Ольга Жигмитова, Буриад улсын Гавьяат жүжигчин Елена Мохосова, Буриад улсын Гавьяат жүжигчин Дамба Занданов, Буриад улсын Гавьяат жүжигчин Мэргэн Санданов, гоцлол дуучин, Олон Улсын уралдааны шагналт Валерия Андреева, Олон Улсын уралдааны шагналт Жамсо Бамбагаев, театрын гоцлол дуучин Надмит Надмитов, Олон Улсын уралдааны шагналт Оюна Дарижапова шилдэг дуучид оролцох юм. Буриад уран бүтээлчдийн гала тоглолтын хөтөлбөрт алдарт хөгжмийн зохиолч Ж.Бизе, Ж.Пуччини, Ж.Верди, Ж.Россини, И. Штраус, П. И Чайковский, В.А Моцарт, Г.Доницетти, А.Каталани нарын сор бүтээлүүдийн хэсгүүд багтаж байгаа бөгөөд Буриадын Дуурь бүжгийн эрдмийн театрын дуучидтай УДБЭТ-ын симфони оркестрын бүрэлдэхүүнтэй хамтран тоглоно.

ОХУ-ын Буриадын Дуурь бүжгийн театрын тухай товч танилцуулахад 1939 онд байгуулагдаж, 1949 онд "Эрдмийн театр" цол авсан аж.

УДБЭТ-ын хамт олон 2025 онд өөрийн тайзнаа Буриадын Дуурь, бүжгийн эрдмийн театрын уран бүтээлчидтэй хамтран тоглох уран бүтээлүүдийн эхнийх нь Ж. Бизе “Кармен" дуурь, “Гала концерт” болж байгаа бөгөөд ирэх зургадугаар сард П.И. Чайковский “Хунт нуур” балет дахин ирж хамтран тоглох юм.