"Тесла" компанийн ашиг энэ оны эхний улиралд огцом буурсан тул Трампийн засаг захиргаатай холбоотой ажлаа эрс багасгана гэж компанийн гүйцэтгэх захирал Элон Маск хэллээ. Компанийн эхний улирлын ашиг өмнөх онтой харьцуулахад 71 хувиар буурсан. Мөнгөн дүнгээр хэлбэл, өнгөрсөн оны мөн үед 1.39 тэрбум ам.долларын ашигтай байсан "Тесла" энэ удаад 409 сая ам.долларын ашигтай ажиллав. Мөн дэлхий даяарх борлуулалт нь 13 хувиар унасан.

Трампийн Засгийн газрын үр ашгийн хэлтсийг удирддаг Маск Мягмар гаригт мэдээлэл өгөхдөө "Компанийнхаа ажилд илүү их цаг зарцуулна. Тавдугаар сараас эхлээд засгийн газартай холбоотой ажлаа долоо хоногт 1-2 өдрөөр танана. Засгийн газрын үр ашгийн хэлтэст шаардлагатай ажлын дийлэнх хэсгийг хэдийнэ хийчихсэн байгаа" гэсэн юм.

"Тесла" компанийн хувьцаа энэ он гарсаар 40 гаруй хувиар унасан. Гэвч Маскийн сүүлийн мэдэгдлээс хэдхэн цагийн дараа 4.6 хувиар өссөн байна. Технологийн тэрбумтны анхаарал өөр зүйлд сатаарч байгаад санаа зовж байсан хөрөнгө оруулагчид энэ мэдээг баяртайгаар хүлээж авав.

Трамп, Маск нарын идэвхтэй хамтралын саруудад ачааны хүндийг "Тесла" үүрсэн гэхэд болно. Тодруулбал, энэ хугацаанд дэлхий даяарх "Тесла"-ийн салбарууд, машинууд, цэнэглэх станцууд цөөнгүй халдлагын бай болсон.

Гэхдээ Элон Маск Засгийн газрын үр ашгийн хэлтэс дэх ажлаа өмгөөлөн үг хэлэхдээ "Миний энэ хүчин чармайлт луйвар, үрэлгэн байдалтай тэмцэж, улс орныг зөв замд нь эргүүлэн оруулах зорилготой. Хэрвээ Америкийн хөлөг живбэл бид бүгдээрээ хамт живнэ, ‘Тесла’ байна уу, юу байна хамаагүй" гэжээ.