Сүүлийн жилүүдэд төрөлт буурч байгаа аж. Өөрөөр хэлбэл, Үндэсний статистикийн хорооны мэдээлэлд дурдсанаар, улсын хэмжээнд өнгөрсөн онд 57.3 мянган эх амаржсан нь өмнөх оноос 10 гаруй хувиар буурсан үзүүлэлт болжээ. Монгол Улс урт хугацааны хөгжлийн бодлогодоо 2050 он гэхэд 5 сая хүнтэй болно. Хүн амын өсөлт жилд 1.7 хувиас дээш байж энэ өсөлтийг хангана гээд тодорхойлчихсон байгаа. Өнөөгийн үзүүлэлтийг харвал 2050 он гэхэд Монгол Улсын хүн амын тоо төлөвлөсөн хэмжээнд хүрэхээргүй байна. Цаашид хүн амаа өсгөх бодлого хэрэгжүүлэхгүй бол 2036 онд 4 сая дах иргэнээ хүлээж авна гэж албаныхан мэдээлсэн байна. Төрөлт буурч байгаа нь олон шалтгаантай. Үүний нэг нь сүүлийн жилүүдэд  нөхөн үржихүйн насны эмэгтэйчүүд хожуу төрөх болсон нь нөлөөлж байгаа аж. Хожуу төрөлт нэмэгдсэнээр нэг өрх 1-2 хүүхэдтэй болох боломжтой гэнэ. Цаашид 2030 он гэхэд төрөлт улам буурах төлөвтэй байгааг мэргэжилтнүүд хэлж байна. Монгол Улсад 3-4 хүүхэдтэй айлыг олон хүүхэдтэй гэр бүлд тооцдог байна.

Өнөөдрийн байдлаар гурваас дээш хүүхэдтэй 167 мянган өрх байгаа ажээ.

Хүн амаа өсгөхийн тулд, нөхөн үржихүйн эрүүл мэндийн бодлого хэрэгжүүлэх, олон хүүхэдтэй гэр бүлийн амьжиргааг дэмжих нь чухал. Мөн хамгийн чухал нь цэцэрлэг сургуулийн хүртээмжийг нэмэгдүүлэх, нийгмийн аюулгүй баталгааг сайжруулах зэрэг олон асуудал байгааг албаныхан онцолжээ.